«Жапым шуйкалыде тӧрлаташ кӱлеш»

Марий Элым вуйлатыше Александр Евстифеев Волжск оласе рӱдӧ больницын йоча отделенийжын леведышыжым октябрь кыдал марте капитально олмыктен шукташ кӱштен.

Тиде пашалан Марий Эл правительствын резерв фондшо гыч 1,5 млн. теҥгем ойырат.

Олмыктымо паша план нерген медицине тӧнежым А.Евстифеев дене пырля ончен савырныме годым тӱҥ врач Дмитрий Фризин каласкален.

Волжск оласе рӱдӧ больницын йоча отделенийже 1983 ийыште посна чоҥымо кум пачашан оралтыште верланен. Тылеч вара, тазалыкым аралыме министр Марина Панькован мутшо почеш, капитально ик ганат олмыктымо огыл.

«Тыгайже кузе лийын кертын, ом пале, но тидым жапым шуйкалыде тӧрлаташ кӱлеш. Уремыште – шыже», – манын Марий Элым вуйлатыше.

Тиде медицине тӧнежыште специализироватлыме медицине полышым Юлсер кундемыште илыше чыла йоча налеш, ий еда 1000 утла икшыве эмлалтеш. Тений пел ийыште гына 557 йочалан медицине полышым пуымо.

«Тыште специализироватлыме чыла тӱрлӧ медицине полыш пуалтеш. Тиде моткоч йӧнан, молан манаш гын икымше пачашыште лабораторий верланен, а пошкудо зданийыште – диагностике базе», – рашемден М.Панькова.

Республикын Минздравше тыгак йоча отделенийын кӧргыжым олмыкташ, кӱварым да тошто пу окнам вашталташ палемден.