|
Жаплан да илышлан келшыше техникум
08.04.2014
Тиде кечылаште Марий Элым вуйлатыше Йошкар-Оласе сервис технологий-влак техникумын тунемме да туныктымо пашаж дене палыме лийын.
Леонид Маркелов эн ончычак тунемме класс ден производственный мастерской-шамычым ончен лектын, тыгодымак тунемше ден туныктышо-влак дене мутым вашталтен.
Йошкар-Оласе сервис технологий-влак техникум республикысе профессиональный образованийым пуышо учреждений-влак кокла ик эн ончыч, 1929 ийыште почылтын, но тунам «8 Март лӱмеш ӱдырамаш паша школ» маналтын. Тушто «тошто коса ваштареш кучедалаш марий ӱдырамаш кадрым» ямдыленыт.
Варажым тунемме вер 6-шо №-ан профессиональный училище семын палыме лийын. Тудо бытовой обслуживаний сферлан пашаеҥ-влакым ямдылен. Тиде жапыште образовательный учреждений ургымо промышленность ден обслуживаний сферлан 17 тӱжем утла специалистым туныктен луктын.
Тачысе техникум нерген ойлаш гын, тудо эн ончычак кызытсе жапын ик эн у оборудованийже, тунемме пӧлемже да, мутат уке, специалистше-влак дене ойыртемалтеш. 2013 ийыште «2009-2012 ийлан Марий Эл Республикыште текстиль да ургымо промышленностьын пашаеҥже-влаклан социальный полы- шым пуымаш» республиканский целевой программе дене келшышын, техникумышто ургымо профилян Ресурс рӱдерым ыштыме. Тидымат кугешнен палемдыман: пытартыш шым ийыште тунемме верын ик выпускникшымат калыклан пашаверым ситарыме шотышто рӱдерыште пашадыме семын регистрироватлыме огыл.
Чылажымат ончен савырнымеке, Леонид Игоревич тунемше да туныктышо-влак дене техникумын актовый залыштыже вашлиймашым эртарен, погы- нышо-шамычын йодышыштлан вашештен.
Мучашлан республикым вуйлатышылан техникумышто 1993 ий гычак пашам ыштыше И.М.Адамова лӱмеш модо театр «Пайрем» у коллекцийжым ончыктен.
— Айдеме кеч-могай ийготыштат илен лекташ полшышо профессийым налже манын, тыште чынжымак чыла условий уло. Таче тиде моткочак кӱлеш, — палемден Леонид Маркелов.
Марий Эл Республик Вуйлатышын мер кыл ден увер виктемже
Кусарымаш - Г.Кожевникова (газет "Марий Эл") |
Жаплан да илышлан келшыше техникум
