Марий Эл правительстве председательын икымше алмаштышыже Евгений Кузьмин республик вуйлатыше Юрий Зайцевын кӱштымыж почеш Запорожский областьысе Куйбышевский районыш миен.
Телеграм-каналыште палдарымыж почеш, тудо мемнан республик полшымо дене ачалыме-тӧрлымӧ пашам эртарыме икмыняр объектым ончен. «Мый Новомлиновка селасе книгагудышто, Куйбышево поселкышто Самырык-влакын рӱдерыштышт, МФЦ верланыме зданийыште, икмыняр моло социальный объектыште лийынам, Марий Элын шефствыш налме тиде районысо депутат-влак дене вашлийынам. Новомлиновка селасе библиотекылан «Единый Россий» партийын марий региональный отделенийже ден республикысе Кугыжаныш архивын, тыгак Марий книга савыктышын чумырымо книгаштым кучыктенам.
Куйбышевский районын администрацийже ден депутатше-влак полышым жапыштыже пуымым, тудын кӱлешлыкшым палемдат да республик вуйлатышылан тӱткышым ойырымыжлан тауштат», – возен тудо.
Евгений Кузьмин Куйбышевский муниципал округын вуйлатышыже-влак дене совещанийым эртарен. Тушто палемденыт: Марий Элын шефствыш налмыж жапыште социальный учрежденийлашке у котел ден ырыктыме системым налын вераҥденыт, тиде район гыч йоча-шамыч ик гана веле огыл республикыштына каненыт, калыклан диспансеризацийым эртареныт. Тыгак ФАП-влаклан Марий Эл гыч эмым, библиотекылашке книгам, коммунал техникым колтымо.
– Ончыкыжым Куйбышев муниципал округ гыч йоча-влаклан кеҥежым Марий Элыште канаш йӧным ышташ, тыште илыше-влакын тазалыкыштым тергаш да эмлаш врач-шамычым кондаш шонымаш уло, – каласен Е.Кузьмин.
Запорожский областьын губернаторжын икымше алмаштышыже Антон Тицкий дене вашлиймаште тений, 2024 ийыште, районын инфраструктурыжым пеҥгыдемдыме шотышто паша планым ыштеныт, моло йодышым каҥашеныт.
Евгений Кузьминын палемдымыж почеш, Антон Тицкий Марий Эл вуйлатыше Юрий Зайцевлан да республикын правительствыжлан подшефный Куйбышевский районлан сай полышым пуымыжлан тауштен да ончыкыжымат келшен пашам ыштымылан ӱшанымыж нерген ойлен.
Л.Камалетдинова ямдылен
