«Юж капка» угыч почылто

Тидне арняште, кушкыжмын, Йошкар-Ола – Москва авиакыл угыч ышташ тӱҥалын. 6 шагатат 15 минут эрдене Марий Элын рӱдолаж гыч самолёт южыш нӧлталтын.

Марий Эл вуйлатыше Александр Евстифеев республикыште илыше-влакым ты кугу событий дене саламлен. Тудо шкежат тиде рейсын пассажирже-влак коклаште лийын. Регион вуйлатыше каласен: кызытсе тӱня илышыште авиакыл пешак кӱлешан – пашалан, туризмлан, канаш, эмлалташ да тунемаш каяш…

- Кузе документ, мутлан, паспорт, деч посна илен огына керт, тугак – авиакыл деч поснат. Таче ме эн ончычак инвестицийым савырыме нерген ойлена. Республик вияҥеш да мыланна партнёр ден инвестор-влак кӱлыт. Кӧмыт тышке толаш, оксам пышташ, производствым почаш, паша верым ышташ ямде улыт. А республикын ӧрдыжкӧ лекташ, мом ыштен да темлен кертмым вес регионлан ончыкташ тыгай йӧнжӧ лийшаш, - ешарен СМИ представитель-влаклан пуымо интервьюштыжо Александр Евстифеев.

Чоҥештылмаш ончыкыжо кузе вияҥ толшаш нергенат тудо мутым тарватен. Кучемын планыштыже – кечывалвел ден йӱдвелкыла, мутлан, Сочи ден Крымыш да Санкт-Петербургыш, авиакорным почаш.

Кок рӱдолам ушышо авиакорныш угыч «Руслайн» авиакомпаний лектын. Самолётын командирже Сергей Каскин Йошкар-Ола аэропортышто юж судно шичме-нӧлталтме полосам сайын ямдылен шуктымым палемден.

- Мый Йошкар-Олашке ныл ий ончыч чоҥештен толынам ыле. Мемнан авиакомпанийна рейслам эртараш тӱҥале, но вара чарныш. Да теве угыч тышке толна. Каласаш кӱлеш, полосам чыла правил ден нормылан келшышын ыштыме. Тидым пилот вигак шижеш. Таче мый тудын дене лӱдде нӧлталташ ямде улам – пассажирын лӱдыкшыдымылыкшылан ситыше пашам шуктымо. Тидыже кӱлешан, мемнан компаний лӱдыкшыдымылыкым тӱҥлан шотла, - ешарыш тудо.

Марий Элын Федераций Советысе представительже Константин Косачев шке коллегыже, Федераций Советын аппаратшым вуйлатыше Сергей Мартынов дене пырля икымше рейс дене чоҥештышт.

- Паша икмыняр ий почела шуйнен. Ты йодышыш тӱрлӧ велым пӧртылаш тӧчен ончымо. Кодшо ийын 22 ноябрьыште Федераций Советыште Россий транспорт министр Евгений Дитрих дене вашлийме годым гына тидым у семын ончалаш тарватен кертме. Юл кундем федерал округышто Йошкар-Олан гына элнан рӱдолаж дене авиакылже лийын огыл. Тидыже Федераций Советын председательже Валентина Ивановна Матвиенком вигак ылыжтыш. Тудо ты йодышлан кӱлынак пиже да шуйкалыде решатлаш таратыш, - рашемдыш сенатор.

Теве кӱшнат да ӱлнат ваш умылен ыштымын саскаже.

х х х

Тиде кечынак Федераций Советын 463-шо пленар заседанийыштыже Марий Эл кугыжаныш кучем органын представительже Константин Косачев Йошкар-Олаште авиакылым угыч ылыжтыме нерген увертарен. А Федераций Советын председательже Валентина Матвиенко Марий Элыште илыше-влакым юж капка почылтмо дене саламлен.

- Мый таче поро шижмашым луктын каласыде ом керт: Марий Эл ден федерал рӱдер коклаште вияш авиакыл угыч ышталте. Те, Валентина Ивановна, ты шотышто раш кӱштымашым пуышда да кандаш тылзе эртымеке увертарем: задачын ужашыжым шуктымо – аэропорт угыч пашам ышташ тӱҥале, авиашупшыктымашым пӧртылтымӧ, - каласен Константин Косачев.

Сенатор тыгак палемден: ончылно тылеч изи огыл да неле задаче вуча – самолёт шичме-нӧлталтме полосам капитально пужен ыштыман.

- Жаплан келшыше да калыклан кӱлешан тыгай йодышым решатлыме да тушко Федераций Советын ушнымыжо – тиде лачак мемнан миссийнам шуктымаш. Вет ме Россий Федерацийысе субъект-влакын кумылыштым шотыш налшаш да полшышаш улына. Кужу жапысе кӱрылтыш деч вара Марий Элысе аэропорт гыч авиакылым угыч ылыжтарыме мыйым куандара. Чылам саламлем! Молодец улыда! Тыгай сай уверже шукырак лийже ыле, - вашеш мутым каласен Россий парламентын кӱшыл палатыжын спикерже Валентина Матвиенко.

Константин Косачев тыгак Марий Элыште 12 гыч 20 июль марте Инвалид-влакын Россий кӱкшытан III кеҥеж спартакиадышт сайын эртыме нерген шке коллегыже-влаклан увертарен.

- Тиде спартакиадылан тӱҥалтышым кандаш ий ончыч пыштыме. Тудо шочын гына, но кумдан шарлен шуктен. Мемнан, марий, спартакиадыште Российысе 65 субъектын представительже-влак таҥасеныт, тушто 2 тӱжем утла участник лийын – тиде чынжымак рекорд, - рашемден Константин Косачев.

Федераций Советын пленар заседанийжын участникше-влаклан ты мероприятийым иктешлыше видеороликым ончыктеныт.

- Пеш сӧрал да поро кумылан спорт таҥасымаш. Тау Марий Элын тудым тыге сайын эртарымыжлан. Марий Эл вуйлатышылан да Паралимпийский комитетын президентше Владимир Лукинлан поро тыланымашым ойлыза. Самырык еҥ-влакын куаныштым, нунын чурийыштым ончен, паралимпийский толкыным умбакыже вияҥдыме шуэш, - каласен мучашлан Валентина Матвиенко.