Марий Эл Республикым вуйлатыше Юрий Зайцевын кандидатурыжым «Единый Россий» Всероссийский политический партийын председательже, РФ Лӱдыкшыдымылык Совет Председательын алмаштышыже Дмитрий Медведев ден «Единый Россий» Генсоветын секретарьже Андрей Турчак сайлан шотленыт.
Вашлиймаште «Единый Россий» Всероссийский политический партийын председательже кугыжаныш ден партийный ресурсым кӱшыл должностной еҥын кидышкыже пуымаш проект ден программе-влакым илышыш шыҥдарымаште сай лектышыш шуаш йӧным пуа манын палемден. Дмитрий Медведев тыгак тений регионышто кугу сайлымаш паша шукталтшаш манын ушештарен.
«Тиде паша республикым да партийный организацийым вуйлатыше семын тендан терген шогымыда почеш эрта гын, сай лиеш ыле. «Единый Российысе коллегына-влаклан примерым ончыктымо шот дене те ала спискыште икымше лияш келшеда ыле, – йодын Дмитрий Медведев Юрий Зайцев деч.
«Единый Россий» Генсоветын секретальже Андрей Турчак тыге ушештарен: 2021 ийыште Кугыжаныш Думыш сайлымашын итогшо почеш партий регионышто пеш сай гычак огыл лектышыш шуын.
«Тидын годымак мемнан депутатна-влак республикын Кугыжаныш Погыныштыжо да Йошкар-Ола депутат-влакын погынымаштышт эн шукын улыт. Нунылан тений угыч сайлалтман. Юрий Викторовичын вуйлатыме пашаште погынышо кугу опытшо республикым вуйлатыме жапыштак партийный пашам сайын шукташ йӧным пуа да Марий Элыште «Единый Российын» позицийжым пеҥгыдемда манын ӱшанем»,– каласен Андрей Турчак.
Марий Элым вуйлатыше республикым вуйлатыме да партийный пашам сайын шуктышаш верч уло вийын тыршаш сӧрен.
Регионым вуйлатышым секретарьлан сайлыме шотышто йӧршешлан рашемдыме пунчалым «Единый Россий» партийын Марий региональный пӧлкаже луктеш.
Марий Эл вуйлатышын пресс-службыжын уверже негызеш П. Шакиров ямдылен
