Юлын яндарлыкше верч

​28 февральыште Марий Элым вуйлатыше Верхневолжский бассейновый округын Бассейновый советшын колымшо, юбилейный, заседанийыштыже участвоватлен.

Александр Евстифеев тиде мероприятийыш погынышо еҥ-влак дене пырля пўртўс дене пайдаланыме, вўд ресурсым аралыме, гидроочистный сооруженийлам чоҥымо пеш кўлешан йодыш-влакым каҥашен, тыгак советын паша летышыж нерген да шошымсо вўдшорлан, кеҥежым да шыжым вўд ташнымылан ямдылалтме нерген форуын учстникше-влакын докладыштым колыштын.

Заседанийым почмыж годым Верхневолжский бассейновый вўд управленийым вуйлатыше Александр Баринов Марий Элын шумо показательже-влак дене палдарен. Тудо тыге каласен: Бассейновый советын заседанийжым эртарыме вер семын Йошкар-Олам арамлан огыл ойырен налме, республикыште уло молан тунемаш.

Марий Элыште мланде кєргысє поянлык дене шолып пайдаланыме случай лийын огыл, чыла паша пуымо разрешений да законодательстве дене келшышын шуталтеш, каласен Александр Баринов. Тудо докладыштыже вўд ресурсым сайын шоналтен да переген кучылтмо пример семын адакат вўдым аралыме кундемлам рашемден палемдыме шумлык республикын пашажым пример семын ончыктен. Вўдым аралыме кундемлаште кумдык дене пайдаланыме раш пале режим ышталтеш. Моло регионышто тиде пашаште шумо показатель 50-60 процентыш шуэш гын, Марий Элыште тудо 98 процентыш шуын, каласен Бассейновый вўд управлений вуйлатыше.

Марий Элым вуйлатыше юбилейный заседанийыш погынышо-влакым саламлен ойлен. Республикыште пўртўсым, эҥер ден ерлам арален кодышаш да яндарлыкыште кучышаш верч эреак чот тыршат, каласен тудо. Александр Евстифеев вўдым эрыктыме сооружений-влакын пашаштлан поснак кугу тўткышым ойырен. Йўмє вўдын качествыжым саемдыме пашам элын президентше «майысе указыштыже» 2024 ий марте жаплан национальный цель да элым вияҥдыме стратегический задаче-влак радамыш пуртен, тидыже республикыште пашам ыштыме пеш кўлешан корнылан шотлалтеш.

2019 ий гыч тўҥалын, ме «Юлым тазаҥдымаш» региональный проект дене келшышын, Юлыш йоктарен колтымо вўдым эрыктыме сооруженийлам уэмдаш тўҥалына, тидын годым кызытсе жаплан келшыше технологийым кучылтына. Тиде проектым шуктышашлан 2019-2024 ийлаште 2 миллиард утла теҥгем, тидын шотыштак федеральный бюджет гыч 1,9 миллиард теҥгем, кучылтына, палемден Александр Евстифеев.

Верхневолжский бассейновый вўд управленийым вуйлатыше докладыштыже республикын правительствыжын эрыктыше сооруженийлам ыштыме да уэмдыме шотышто пашажым кўкшын аклен.

Заседанийыште Чебоксар ГЭС-ыште вўдын уровеньжым нєлталме дене кылдалтше ўчашымаш да лукмо пунчал-влак шотыштат уэш ойленыт.

Александр Евстифеевын ты йодыш шотышто шонымашыже раш: республик вўд кўкшытым нєлталме ваштареш шога, молан манаш гын, вўдын кўкшытшым нєлталмаш ялозанлыклан пеш кугу эҥгекым конда. Вўдын кўкшытшым нєлталытак гын, Курыкмарий ден Юрино районлаше шурным шочыктен кертше эн чапле мландым йомдарена, Медведево район марте мланде купаҥын кертеш, каласен республикым вуйлатыше.

Заседанийыш погынышо-влак вўд ресурсым кучылтмо да аралыме, тидын шотыштак эҥер-влакын серыштым пеҥгыдемдыме дене кылдалтше эше ятыр темым тарватеныт.