Марий Элым вуйлатышын пашажым жаплан шуктышо Юрий Зайцев Юл кундем кугыжаныш технологий университетлан 90 ий теммым палемдымаште лийын да педагог-влакым вузын лӱмгечыж дене саламлен.
«Юлтех» кугу шанче вийым чумырен, палемден тудо, тусо учёный-влакын шымлымашышт увер ден телекоммуникаций, радиоэлектронике ден машиностроений, энергийым перегыше технологий ден чоҥымаш, биотехнологий ден пӱртӱсым аралымаш кумдыклам авалта. Шуко поро пашам нуно ыштеныт да ыштат. Санденак Юрий Зайцев икмынярыштлан кӱкшӧ наградым кучыктен.
Погынышо-влакым тыгак РФ Федерал Погынымашын Федераций Советшын председательжым алмаштыше, Марий Эл деч сенатор Константин Косачев саламлен. «Юлтехым» республикыште веле огыл, уло Россий мучко, тыгак вес эллаштат палат, палемден тудо.
Лӱмгече дене ветеран, педагог, выпускник да студент-влакым тыгак Марий Эл Кугыжаныш Погын председатель Анатолий Смирнов, Марий Элыште Тӱҥ федерал инспектор Павел Волков, Йошкар-Ола да Марий митрополит Иоанн, ӱжмӧ моло уна саламленыт.
Марий Эл Республикым вуйлатышын организаций да аналитике виктемжын уверже негызеш Ю.Исаков ямдылен
