«Юл кундемыште тыгайже икте веле»

Марий Эл Республик вуйлатыше А.Евстифеев пӱртӱсым аралыме волжский межрегиональный прокурор Вениамин Селифанов да пӱртӱсым аралыме марий межрайонный прокурор Ильнур Нафиков дене вашлийын.

Александр Евстифеев регионысо кумдыкышто пӱртӱсым арален кодымо дене кылдалтше пырля шуктымо пашаш у прокурор вигак ушна манын ӱшаным ыштен. Тидын годым волжский прокурор Ильнур Нафиковын кӱкшӧ профессинализмжым палемден. Вет тудо прокуратур органыште 2007 ий гычак ышта. Ончыч прокурорын полышкалышыже, вара кугурак полышкалышыже, пӱртӱсым аралыме казанский межрайонный прокурорын алмаштышыже, РФ Прокуратур университетын Озаҥысе филалыштыже прокурор надзор кафедрын вуйлатышыже лийын.

Паша вашлиймаш годым Марий Элыште пӱртӱсым аралыме дене кылдалтше тӱрлӧ йодышым каҥашеныт. Вениамин Селифанов регионыштына ты шотышто кучемын органже-влакын  тӱрлӧ направлений дене пашам сайын шуктымыштым палемден. Предприятий-влакын производство отходышт йырым-йырысе средаш эрыкталтде огеш лек. Ты шотышто Марий целлюлоз-кагаз комбинатымак налаш. Юл эҥер мучко тыгай регионжо иктак гына,  куштыжо кызытсе жаплан келшыше эрыктыме сооружений уло. Шке вий дене вӱд пундаште улшо судно-влакымат нӧлта, эҥер серым вел огыл эрыкта да тӱзата.  Моло регионат ты шотышто тудын деч тунем кертыт. Вольыкым тойымо шӱгарла-влакым шотышто кучымо йодышат республикыште огеш шого. Пеҥгыде шӱкшакым кучылтмо, вӱд пундаш гыч судно-влакым нӧлталтме да моло шотыштат йодыш-влак тергалтыт, рашемден Селифанов.

А.Евстифеев республикыштына пӱртӱсым аралыме йодыш шотышто сай пашам кӱкшын аклымылан тауштен да у Чодыра планым ыштыме нергенат ушештарен. Мучашлан республикын кучемже ден пӱртӱсым аралыме прокуратурын ончыкыжымат ваш келшен пашам ышташ тӱҥалме да шумо лектышым арален кодаш кӱлмӧ нерген мутланен келшеныт.