Йошкар-Ола пайрем вашеш сылнештеш

Кундемым вуйлатыше туризм сферылан поснак кугу тӱткышым ойырен. Республикын рӱдолаже турист-влак коклаште кугу интересым луктеш, тений Йошкар-Олаш толын коштшо уна-влакын чотышт палынак ешаралтеш. Лӱмгече-влакым пайремлаш ямдылалтмаш шуко тӱрлӧ пашам авалтышаш. Тиде – корнылам, зданий-влакын ончыл велыштым олмыктымаш, олаште илыше ден толын коштшо уна-влакын каныме верыштым тӱзатымаш, общественный транспортын пашажым саемдымаш, уремлаште пушеҥге, вондер-влакым да пеледышым шындымаш. Чыла тиде пашам шукташ ешартыш окса кӱлеш лиеш, каласен Александр Евстифеев.

Йошкар-Олан мэрже Евгений Маслов рӱдолам тӱзатыме паша кӱрылтыш деч посна шукталтеш манын палемден. Пайрем-влаклан ямдылалтме шотышто кодшо ийыште шагал огыл ыштыме. Тидлан Россий Президентын тӱҥалтышыж почеш шукталтше нацпроект-влакат сай йӧным ыштеныт. Ятыр уремыште корным олмыктымо, республикым вуйлатышын кӱштымыж почеш Чавайн бульварым тӱзатыме, ешарен Евгений Маслов.

Республикым вуйлатыше лӱмыштышт «Сеҥымаш» мут улман чыла объектлан тӱткышым ойыраш кӱштен. Александр Евстифеев пример шотеш Сеҥымашын ХХХ идалыкше лӱмеш культур полатын зданийжым ончыктен. Тиде полатым 2021-2022 ийлаште олмыкташ палемдыме, но тудын ончыл велжым тенияк уэмдаш кӱштен.

Александр Евстифеев уремлам волгалтарыме пашалан пижаш да архитектурный объект-влакын озашт шотышто реестрым ышташ олан мэржылан темлен.

Марий Элын министрже – республикым вуйлатышын полномочный представительже Николай Коротков Кугыжаныш Погынын кодшо ий декабрьысе сессийыштыже «Марий Эл Республикыште административный правонарушений нерген» Марий Эл Республикын Законышкыжо вашталтышым пуртымо нерген» лукмо у Закон тӱзатыме правилым пудыртымылан объект-влакын собственникыштым мутым кучаш шогалташ йӧным пуа манын палемден. Тидын годым законодательстве шукталтшаш, каласен Александр Евстифеев.

Марий Элым вуйлатыше культурно-развлекательный мероприятий-влакын радамле планыштым ямдылен шукташ тӱвыра, савыктыш да калык-влакын пашашт шотышто министр Константин Ивановлан кӱштен. Кундемын сеҥымашыжым, федеральный кӱкшытыштат сайлан шотлен палемдыме Чумыр марий йоча хорым лийме семын кумдан ончыкташ темлен.

Совещанийыште тыгак республикысе вуз-влакын регион-влак кокласе конференцийлам эртарыме, республикын пашажым моло субъектлаште ончыктен шогымо шумлык йодышымат каҥашыме.

Марий Элым вуйлатыше пайрем-влаклан ямдылалтме пашаш чыла министерстве ушнышаш манын каласен.