Йошкар-Ола аэропорт кумдаҥеш

Александр Евстифеев, вашлиймашке погынышо-влакым саламлен ойлышыжла, ончышаш паша радамыште улшо йодыш-влак дене палдарен.

Икымше йодыш аэропорт дене кызыт пайдаланыме дене кылдалтын. Тыште экономике шотан проблеме-влак улыт. Тышеч икмыняржым ме Росавиацийыште каҥашенна да ончыкыжо мом ыштышашым палемденна. Проблемын моло ужашыже тура вашталтышым ыштымашке шуктышаш. Эше ик теме уло. Тиде – аэропортын у зданийжым ыштымаш. Кумшо йодыш – чоҥештен кўзымӧ да волен шичме полосам уэмдымаш. Тыгак конкуренцийым ыштышашлан моло авиакомпаний-влакым ушаш кўлеш, тидыже аэропортын ыштен шогымо авиационный услугын качествыжым саемдаш полша ыле, каласен Александр Евстифеев.

«Аэрофьюэлз Групп» ООО-н генеральный директоржо Владимир Спиридонов пырля пашам ышташ ямде улмыжым ончыктен да аэровокзал-влакым вияҥдыме шотышто компанийын погымо кугу опытшо нерген каласкален. Тудо компаний Российысе да тўнясе ятыр кугу авиакомпаний дене кылым куча манын ешарен да Йошкар-Ола аэропортым вияҥдыме шотышто шонымашыж дене палдарен.

Владимир Спиридоновын мутшо почеш, темлыме проектым илышыш шыҥдарымаш рейс-влакым шукемдаш да обслуживатлыме пассажир йогыным ешараш, у авиаперевозчик-влакым ушаш, авиакылым кучымо географийым кумдаҥдаш йӧным пуа. Рейс-влакым обслуживатлымашке «Победа» да моло лоукостерым ушымо негызеш авиабилетын акшым шулдештараш лиеш.