7 декабрьыште Марий Эл Республикым вуйлатыше Юрий Зайцев «Единый Россий» Всероссийский политический партийын председательже Д.А.Медведевын региональный общественный приёмныйыштыжо граждан-влаклан приёмым эртарен.
Морко районысо самырык педагог-влакын советыштын председательже Надежда Алексеева Морко районный тоштерым олмыкташ йодын. Тудо йоча-влакым патриотизм шӱлышеш шуарен куштымаште, шочмо кундемын историйже дене палдарымаште М.Н.Янтемир лӱмеш литературно-этнографический тоштер кугун полша манын. Тоштер верланыме пӧртым 1939 ийыште чоҥымо, ынде олмыкташ жап шуын. 2024 ийыште Морко районлан 100 ий темеш, калык тоштерым уэмдымым моткоч вуча, каласен туныктышо.
Юрий Зайцев йоча-влакым патриотизм, элын исторический ден культурный эртыше жапшым пагалыме шӱлышеш шуарен куштымаш пеш кӱлешан паша манын палемден.
Морко муниципальный районын администрацийжым вуйлатыше Александр Голубков Морко районный тоштерым шушаш ийыште «Культур» национальныцй проект кышкарыште капитально олмыктена. 2024 ий 1 сентябрь марте тоштер верланыме пӧртын негызшым олмыкташ, тӱжвал велымат, кӧргӧ велымат уэмдена, электричестве системым вашталтена манын каласен.
Масканур селаште илыше Людмила Зайцева У Торъял деч ты районысо Масканур марте шуйналтше корным олмыкташ йодын. Тиде корно пеш кӱлешан, тудын дене верысе калык йоча-шамычым школыш да йочасадыш шупшыкта, пашаш коштеш.
Юрий Зайцев корнын тиде ужашыже «Лӱдыкшыдымӧ да сай качестван корно» национальный проектыш пурталтын, еҥ-влакын йодмыштлан кӧра тудым ик ийлан ондак олмыкташ палемдена манын вашештен.
Республикын транспорт да корно озанлык министрже Александр Герасименко кызыт олмыктымо пашам шуктышашлан подрядчикым палемдаш кӱлшӧ аукционный документацийым ямдылена манын каласен.
Автокорным олмыктымо пашам 2024 ийыште мучашлаш палемдыме.
Йошкар-Олаште илыше Наталья Куклина деч пурышо йодмаш Яков Эшпай уремысе 118-ше №-ан аварийный илыдыме пӧрт дене кылдалтын. Тушто тулым олтат, аракам погынен йӱыт, тидыже пошкудо кудвечысе еҥ-влакым чот тургыжландара.
Йошкар-Олан мэрже тиде аварийный пӧртым 2024 ий март мучаш марте рончен шукташ палемдыме манын вашештен.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
