Марий Эл вуйлатыше «За достойное воспитание детей» почетан знакым учредитлен.
Республик вуйлатышын тидын нерген указшым официальный сайтыште савыктыме.
Документ дене келшышын, награде Марий Элыште 5 ий деч шагал огыл илыше, кокыт да тылеч шукырак йочам ончен-куштышо граждан-влаклан пуалтеш. Тыгодым икшыве-влакын сайын тунеммышт, тыршен пашам ыштымышт, спортышто, творчествыште, наукышто, искусствышто кӱкшытыш шумышт шотыш налалтеш.
Награде дене пырля нине еҥ-влаклан оксам тӱлат. Шийвундо республикын бюджетше гыч ойыралташ тӱҥалеш.
Тиде наградым сулышо-влаклан икымше гана тений Аван кечыже вашеш кучыктат.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
