Марий Эл Республикын правительствыштыже агропромышленный комплекслан специалист-влакым ямдылыме йодышым каҥашыме.
Республик правительстве председательын алмаштышыже Дмитрий Троицкий регионысо агропромышленный комплексын предприятийже-влаклан кадрым ямдылыме йодыш дене кылдалтше совещанийым эртарен.
Мероприятийыште республикын ялозанлык да кочкыш сату министрже Андрей Кондратенко, образований да науко министрже Лариса Ревуцкая, кӱшыл шинчымашым пуышо организаций-шамычын еҥышт, ончыл ялозанлык предприятий вуйлатыше ден специалист-влак лийыныт. Совещанийыште кугыжаныш кучем, образовательный организаций да ялозанлык предприятий-влакын еҥышт коклаште пайдале мутланымаш лийын. Тидым палемдыме: кызыт АПК предприятийлаште кӱшыл да кокла профессиональный шинчымашан, тыгак тӱшка профессиян пашаеҥ-влак огыт сите. Поснак кугу тӱткышым школышто тунемше-влакым ялозанлык пашалан, аграрный профессийлан изинек шӱмаҥдыме йодышлан ойырыман.
АПК предприятий вуйлатыше-влак отрасльлан специалист-шамычым ямдылыме качествым саемдыме йодышым нӧлталыныт. Вет кызыт производственный процессым утларак да утларак автоматизироватлат. Тидлан келшыше шинчымаш кӱлеш.
Дмитрий Троицкий палемден: кугыжаныш да шинчымашым пуышо организаций, тыгак агробизнес могырым АПК-лан кадрым комплексно ямдылаш кӱлеш. Тудын мутшо почеш, образовательный организаций ден ялозанлык сатум ыштен налше-влак коклаште вияш кылым ыштыман, ялозанлык производствын ойыртемжым шотышт налын, тунемме планын структурыжым вашталтыман, самырык специалист-влакым ялеш пеҥгыдемдышашлан йӧным ыштыман да льготым пуыман, образовательный организацийлашке самырык-влакым ойпидыш почеш тунемаш колтыман.
Марий Эл Республикым вуйлатышын администрацийжын информаций паша пӧлкажын уверже негызеш В.СМОЛЕНЦЕВ ямдылен
