20 декабрьыште Марий Эл вуйлатыше Юрий Зайцев правительстве пӧртыштӧ Сбербанк ПАО-н вице-президент, Волго-Вятский банкшын председательже Петр Колтыпин дене вашлийын.
Социальный сфере, регионын экономикыже дене кылдалтше йодыш-влак деч посна нуно инвестицийым кузе кондышаш, тӱвыра ден спорт аланлашке банкын цифровой сервисшым кузе шыҥдарышаш нерген мутланеныт.
Юрий Зайцев палемден: правительстве ден Сбербанк коклаште социальный инфраструктурым вияҥдыме шотышто пайдале вашкыл ышталтын.
Петр Колтыпинын ойлымыж почеш, Сбербанк вуйлатыше-влак регионын экономикыжым, здравоохраненийжым, образованийжым вияҥдымаште полшаш, нине да икмыняр моло сферыште цифровой услуго дене пайдаланаш йӧным шараш да кугемдаш задачым шынденыт.
Марий Эл вуйлатыше ден Сбербанк ПАО-н вице-президентше, Волго-Вятский банкын председательже тыгак республикыште IT-кластерым, туризмым вияҥдымаште, кундемым тӱзатымаште вашкылым эшеат сайракым ыштышаш нерген посна мутланеныт.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен