Марий Элыште верысе калыкын тӱҥалтышыжлан полышым пуымо программе почеш шым ий жапыште 278 миллион теҥгеаш 347 проектым илышыш шыҥдарыме. Тышечын 204 миллионжым республикын бюджетше гыч субсидий семын ойырымо.
Тыгай программе республикыштына илышыш 2014 ий гыч шыҥдаралтш тӱҥалын. Сеҥышыш лекше проект-влак почеш илыме верлаште, уремлаште автомашина кудалыштме корным, тротуарым, шарныктышым ачалыме, йоча да спорт площадкым чоҥымо, тӱшкан пайдаланыме верлам, кудывечым, каныме верлам тӱзатыме, уремым йӱдым волгалтараш йӧным ыштыме, шӱкшакым погымо контейнерлам шындыме да шуко моло пашам шуктымо. Командировкыш лектын коштмына годым ме чыла тидым шке шинчана дене ужынна да тушто илыше калыкын кучемлан тауштымыжым ик гана веле огыл колынна. Тыге Медведево районышто, мутлан, кодшо ийын вич проектым илышыш шыҥдарыме ыле, тений – кандашым.
Марий Элым вуйлатышын пашажым жаплан шуктышо Ю.Зайцевын кӱштымыж почеш, тиде программе почеш 2023 ийлан оксам ойырымо кугыт кок пачаш ешаралтеш. Тылеч посна верлаште йодмашым погымо жапым шуйымо, илышыш шыҥдараш лийме проект-ылакын чотыштым кугемдыме. Проект-влаклан финансым ойырымо кугытым шушаш ийлан республикын бюджетышкыже пыштат.
Верлаште 20 сентябрь марте шушаш икмыняр ийлан темлымаш-влакым погеныт. Тидын деч ончыч яллашке, селалашке лӱмын анкете-влакым шареныт ыле. Ынде анкетлашке возымо йодмаш-влакым верысе администрацийлаште каҥашат, келшышыжым ойырен налыт. Пурышо проект-влакым республикыште лӱмын ыштыме комиссий каҥашаш тӱҥалеш. 1 ноябрьлан тыгак 2024 да 2025 ийлаште илышыш шыҥдаралтшаш проект-влак пале лийыт. Проект-влакым ойырен налме годым нунын социально кӱлешлыкыштым, нунын дене пайдаланыше еҥ-влакын чотыштым да проектлан верлаште пыштыме надырым шотыш налыт.
В.Смоленцев
