Йошкар-Оласе медицине колледжыште Пашаш пураш полшымо шотышто комиссийын йыжыҥъеҥже-влак кугурак курслаште тунемше-шамыч дене ончыкылык паша вер нерген мутланеныт.
Тыгай вашлиймаш – «Марий Эл Республик здравоохранений системын медицине организацийлаштыже квалифицироватлыме кадрым ситарымаш» регионысо проектым илышыш пурташ йӧным ыштыше эше ик ошкыл.
Июньышто колледжым 315 самырык специалист – 200 медсестра, 51 фельдшер, 16 акушерке да 58 фармацевт – тунем пытара. Нуно чыланат шке профильышт дене пашам ышташ толыт гын, республикыштына кадрым ситарыме пӱсӧ йодыш мыняр-гынат чакна ыле. Но пытартыш ийласе практике ончыктен: самырык специалист-влак кокла гыч икмыняр ужашыже ала-кунам ойырен налме профессийже дене пашам ышташ огеш кай.
Марий Эл Тазалык аралтыш министерствын ведомствыштыжо улшо медицине организаций-влакын йодмашышт почеш, кызыт 336 врач ден 391 кокла медицине пашаеҥ кӱлыт.
Медицине кадрым пашашке кумылаҥден кондаш да кодаш манын, республик да муниципалитет кӱкшытлаште, медицине организацийлаште социальный полыш мере-влакым ыштат, служебный илыме верым ойырат, должностной окладыш ешартыш выплатым пеҥгыдемдат, илыме да коммунал услугылан тӱлымӧ роскотым пӧртылтат, медпашаеҥ-шамычын икшывыштлан йочасадлаште верым ойырат.
Россий Федерацийын президентше Владимир Путинын кӱштымыж почеш 2024/2025 тунемме ийыште элнан кокла профессиональный шинчымашым пуымо тӧнежлашкыже граждан-шамычым 10 процентлан шукырак тунемаш налыт. Йошкар-Оласе медицине колледжыштат приёмым кугемдат.
– Вашлиймашыште южо выпускник паша биографийым тӱҥалаш шонымо медорганизацийым палемден, – манеш колледжын директоржо Леонид Рыжков. – Ынде, у пашаеҥ-влак ойырен налме медицине организацийлаште эрелан кодышт манын, вуйлатыше-шамычлан коллективыште келшыше условийым ышташ кӱлеш.
М. Иванова
