Вудшорат, тулат азапыш ынышт шукто

​26 февралтыште Марий Элым вуйлатыше Александр Евстифеев чрезвычайный ситуаций лийын кертме лўдыкшым ончылгоч кораҥдыме да пытарыме, пожарный лўдыкшдымылыклан йєным ыштыме шотышто правительственный комиссийын черетан заседанийжым эртарен. Тушто кундемым вўдшорлан ямдылыме йодышым каҥашыме. Заседанийыш погынышо-влак тыгак чодыра озанлыкым да республикысе илемлам тений шошым да кеҥежым тул пижын кертме лўдыкшє пагытлан ямдылыме йодышым онченыт.

Кодшо ийыште республикын правительствыже муниципальный образований-влакын администрацийыштын балансыштышт улшо тул ваштареш кучедалме средствын технический состоянийже дене кылдалтше йодышлан кугу тўткышым ойырен. Теният тиде пашам умбакыже шуяш кўлеш, каласен Александр Евстифеев.

Тиде заседаний деч ик кече ончыч «Сосновый бор» санаторийыште пожар лийын. Заседанийыш погынышо-влак тиде происшествийымат шотыш налде коден огытыл.

Россий МЧС-ын Марий Элысе тўҥ управленийжын начальникше Александр Малкинын мутшо почеш, 16 шагатыште санаторийын дежурный администраторжо деч малыме корпусын ик пєлемыштыже тул ылыжме нерген увер пурен. Автоматический пожарный сигнализаций, тыгак пожар годым азап лийме нерген увертарыме да еҥ-влакым эвакуироватлыме пашам виктарыме системе-влак штатный режим почеш чўкталтыныт, тидлан кєра каныше-влакым да дежурный персоналым пожарный охране подразделений-влакын толын шумышт деч ончычак тўжваке луктын шуктымо. Тул ик пєлемым локтылын, кызытеш пожарын амалжылан телевизорышто лийше кўчык замыканий шотлалтеш. Тул пижме годым зданийыште 160 еҥ лийын. Иктат азапыш логалын огыл.

Республикым вуйлатыше еҥ-влакын сутка мучко лийман социальный объект-влакын вуйлатышыштлан пожарный сигнализацийын да моло оборудованийын пашам ыштымыштым палемдыме жапым ончыде тергаш кўштен.

Тылеч посна Минспорт, Минобрнауко, Минсоцразвитий да Минздрав, Марий Эл вуйлатышын кўштымыж почеш, объект-влакын персоналышт дене тул ваштареш кучедалме шотышто плановый огыл инструктажым, тыгак тул пижме годым еҥ-влакым эвакуироватлыме шотышто тренировкым эртарышаш улыт.

Мероприятийлам шуктымо нерген ведомство-влакын вуйлатышыштлан Россий МЧС-ын Марий Элысе тўҥ управленийжылан да Гражданский обороно да калыкым аралыме комитетыш 15 март марте увертараш кўштымє.

Муниципальный образований-влакын вуйлатышыштлан калык коклаште профилактике пашам умбакыжат кўрылтыш деч посна шуктен толаш темлыме. Тидын годым Александр Евстифеев тул ваштареш кучедалме шумлык агитацийым лўмжылан гына эртарымым чарнаш ўжын.

Комиссийын заседанийыштыже ончымо чыла йодыш дене доклад-влакым колыштмо да келшен толшо пунчалым лукмо.