Воинский Чап мемориал уэмеш

Йошкар-Олаште «Сеҥыше воин» памятникым, «Курым-курымаш тул» да «Герой-влакын аллейышт» мемориал комплекс-влакым, тыгак радиационный  катастрофо-влакын жертвыштлан да локальный сар-влакын жертвыштлан ыштыме мемориал-влакым ушен шогышо ансамбльын чыла объектыштыже тєрлен олмыктымо пашам шукташ палемдыме. Чыла тидын нерген Марий Элым вуйлатыше Александр Евстифеев ден олан мэрже Евгений Маслов 18 сентябрьыште Йошкар-Олан Культур да каныш рўдє паркыштыже радамлын мутланеныт.

Республикым вуйлатыше чыла пашам тений тўҥалаш да шушаш ий апрельыште умбакыже шуяш кўштен.

Паркын директоржо Андрей Шестаков «Сеҥыше воин» памятник воктене гранит плита-влакым вашталташ да Курым-курымаш тулын постаментшым олмыкташ кўлмым палемден. Тушто тыгак комплексын шўдыржым вашталтыман. Тудым шке жапыштыже Марий машиностроитель заводын пашаеҥже-влак бронзо гыч ямдыленыт.

Радиационный катастрофо-влакын жертвыштлан да локальный сарлаште колышо-влаклан почмо кок мемориаллан поснак кугу тўткышым ойырымо. Тушто возымым эрыктен тєрлаташ кўлеш. Александр Евстифеев кок мемориалынат айлыме кумдыкым уэмдаш, газонлаште кызытсе жаплан келшыше пеледыш вазон-влакым вераҥдаш темлен. Чыла паша «Афганистан ветеран-влакын ушемышт» мер организацийын региональный пєлкаж дене кутырен келшыме почеш шукталтшаш, ешарен республикым вуйлатыше.

Шушаш ий – юбилейный. Российын президентше Владимир Путинын Указше почеш тудым Шарнымаш да чап идалык семын увертарыме. Республикыште мемнан рўдє мемориал комплекс гай исторический объект-влакым тўзатен уэмдыме дорожный картым ямдылыме, каласен Марий Элым вуйлатыше.

Самырык тукымым патриотизм шўлышеш шуарен куштышашлан республикыште «Патриот» парк ышталтеш, «Авангард» кугу федеральный проект илышыш шыҥдаралтеш. Тудын дене келшышын, ончыкылык призывник-влаклан учебный мероприятийлам эртарыме комплекс ышталтеш.

Сеҥымашлан 75 ий темме идалыкыште Йошкар-Оласе Воинский Чап мемориаллан 45 ий темеш. Тидыже символла чучеш. Тудо скульптор Анатолий Ширнинын проектше почеш ышталтын.

Марий Элын рўдолаштыже культур да каныш парк кундемыште мемориал ансамбль верланыме кумдыкым 1960-1970 ийлаштак  тўзаташ тўҥалме. «Курым-курымаш тул» кўкшака верыште вич лукан шўдыр семын ыштыме верыште 1975 ий 9 майыште чўкталтын. Факелым Лениградысе Пискаревский мемориал шўгарласе Курым-курымаш тул деч ылыжтеныт да Йошкар-Олашке тудым Совет Союз Герой А.И.Владимиров ден сарын ветеранже Н.М.Васильев бронетранспортёр дене конденыт.

1975 ийыште Кугу Отечественный сарыште совет калыкын сеҥымыжлан 30 ий теммылан пєлеклалтше монументальный памятник-влакын всесоюзный выставкыштышт Йошкар-Оласе Воинский чап мемориал ансамбль ик эн сайлан шотлалтын. Проектын авторжо-влак СССР ВДНХ-н медальже дене палемдалтыныт: Анатолий Ширнинлан шєртньє, Николай Ведерниковлан ший медальым кучыктымо. Эн сай чоҥышо-влак ВДНХ-н бронзо медальже дене палемдалтыныт.