Шинчымаш кечын Марий Элым вуйлатыше Юрий Зайцев Юл кундем кугыжаныш технологий университетыште эртыше торжественный линейке годым студент-влакым у тунемме ий тӱҥалме дене саламлен.
«Тиде пайрем чылалан моткочак кӱлешан – преподаватель, студент, ача-ава-влаклан, а технический университетын лондемжым икымше гана вончышо ӱдыр-рвезе-шамычлан гын – поснак. Тек тунемме идалыкын тӱҥалтыштыжак шинчымашым налме да у илышыш корно тыланда почылтшо лиеш. Тудым пеҥгыдын, шкан ӱшанен, преподаватель-наставник-влакым колыштын да туныктымыштым ушыш пыштен эрташ тыланем», – каласен тудо.
Юрий Зайцев палемден: университетын студентше-шамыч ик эн кугулан шотлалтше, историйлан да йӱлалан поян шанче-тунемме тӧнежыште шинчымашым погат. Тудым шке жапыштыже кумдан палыме учёный, кугыжаныш да мер деятель, тыгак ик эн ончыл промышленный, чоҥышо, чодыра озанлык предприятий ден объединенийым, банк структурым вуйлатыше-влак тунем пытареныт.
Тенийысе Шинчымаш кечын Юл кундем кугыжаныш университетыште у военный тунемме рӱдер почылтын. Тушто, тунеммаш деч кӱрылтде, студент-влак кызытсе военный-учётный специальностьым налаш тӱҥалыт. Ончыкыжым тыште, илышын йодмашыже дене келшышын, у направлений-шамыч почылтыт. Тений 1 сентябрь гыч рӱдерыште 108 студент шинчымашым погаш тӱҥалеш. Нунын занятийыштлан чылаже10 пӧлемым ойырымо.
«Кызыт шочмо эллан, обороно промышленностьлан да наукылан тыгай специалист-влак моткочак кӱлыт. Чыныжымак, ончыко кугу ошкылым ыштеда манын ӱшанем», – каласен регионым вуйлатыше.
Студент-влаклан тыгак поро тыланымашым Федераций Совет председательын алмаштышыже, Марий Эл кугыжаныш кучемын исполнительный органжын еҥже Константин Косачёв, республикын Кугыжаныш Погынжын председательже Анатолий Смирнов да Юл кундем кугыжаныш технологий университетын ректоржо Игорь Петухов ойленыт.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
