Вияҥаш полшышо вашкыл

Санкт-Петербургышто Российысе регион-влакын VI форумышт эрта. Тушто Россий ден Беларусьын вияҥмышт дене кылдалтше йодыш-влакым каҥашат.  Марий Эл вуйлатыше Александр Евстифеев тушто лийын да белорус партнер-влак дене ваш келшен пашам ыштыме нерген палдарен, форумын дискуссионный площадкылаштыже участвоватлен.

Таврический полатыште эртыше Экспертный сессийым Беларусь велым   Тӱнямбал паша да национальный лӱдыкшыдымылык шотышто советын председательже И.Ухманов, а Россий велым Российысе науко академийын Европо институтшын директоржо А.Громыко да Федераций Советын Тӱнямбал паша шотыштто комитетшым вуйлатыше, Марий Эл деч сенатор К.Косачев вӱденыт. Лач тушто А.Евстифеев белорус партнёр-влак дене ваш келшен ыштыме, тыгак регионыштына йытыным ончен куштымо  нерген каласкален.

Марий Эл ден Беларусь коклаште сатум ужалыме кугыт кодшо ийын 75,2 миллион долларыш шуын гын, Беларусьыш сатум экспортироватлыме кугыт - 69,5 миллион долларыш. Тӱҥ шотышто ме топливно-энергетический комплексын продукцийыжым,  оборудований ден маханический устройствым, электрический машина ден оборудованийым ужалена. А тушечын кондымо сату кугыт 5,7 миллион долларыш шуын. Тыгак оборудований ден механический устройствым, парфюмер ден косметический сатум кондена.

«Оршанкысе «Лен» агрохолдинг кызыт 77 гектарыште йытыным ончен кушта. Предприятий кушко тудым ужалышаш йӧным кычалеш, партнер семын белорус-шамычымат ужеш.

Марий Эл ден Беларусь коклаште тӱвыра да научно-технический йодыш шотыштат кыл пенгыдем толеш. Икте-весе деке делегаций-влак миен толыт. Мутлан, Йошкар-Олаште эртаралтше «Келшымаш кӱвар» тӱнямбал фестивальыште Минск гыч национальный академический театр эре участвоватла. Кок субьектысе вуз-влак коклаште кыл сай, вашла тӱрлӧ мероприятийыш ӱжыт.

Озаҥыште Беларусь Республикын РФ-се посольствыж денат кылна сай. Кодшо ийын тудын вуйлатышыже О.Исаев Йошкар-Олаш толын коштын. Лач тунам тӱрлӧ отрасльыште вашкылым ыштыме шотышто пайдале мутланымаш лийын. Беларусь ден Российысе регион-влакын визымше форумышт годым кок эл правительстве-влак коклаште ваш келшен пашам ыштыме шотышто ойпидыш ышталтын ыле. Тудын дене келшышын мемнан республикысе правительстве варажым шкенжын мероприятий планжым Беларусьыш колтен. Кызыт ты документым тусо-влак ончат. Тиде планышке Марий Элллан пайдам конден кертше шуко сай темлымаш пурталтын.

А.Евстифеев тыгак форумын икмыняр секцийыштыже участвоватлен да пайдале деловой вашлиймашым эртарен.