Марий Эл вуйлатыше Россий президентын Юл кундем федеральный округышто полномочный представительже пеленысе Советшын заседанийжын пашашкыже ушнен.
Заседаний Уфаште лийын. Тудым Россий президентын Юл кундем федеральный округышто полномочный представительже Игорь Комаров эртарен.
Погынышо-влак ПФО-со регионлаште кучем ден верысе самоуправлений орган-влаклан ӱшан нерген мутланеныт.
Игорь Комаровын палемдымыж почеш, регионласе кучемлан еҥ-влак дене пайдале вашмутланымашлан посна тӱткышым ойырыман, нуным решений-влакым лукмашке ушыман, ЦУР-влак полшымо дене кылым пеҥгыдемдыман, шонымашыштым палыман.
– Регион вуйлатыше-влак соцкыллам чолган кучылтыт. Тидын шотышто мемнан округ – элыштына ончыл верыште. Муниципалитет кӱкшытыштӧ увер ресурс-влакым поснак чолган кучылтман, – каласен тудо.
Тыгак кучемлан ӱшаным ончыкташ ик эн кугу фактор семын СВО участник-влаклан полышым пуымым палемденыт. «Защитники Отечества» кугыжаныш фонд председатель Анна Цивилеван ойлымыж почеш, спецоперацийын ветеранже ден ӱмыр лугыч лийше-влакын лишыл еҥышт-влакын лекше йодышыштым писын да келшышын решатлыман.
– Полышым пуымо шотышто Юл кундем федеральный округысо субъектлаште ятыр ойыртемалтше проект уло. Нунын кокла гыч эн сайыштым элнан моло регионыштыжат илышыш пурташ кӱлеш, шонем, – каласен тудо.
Марий Элыште ик эн тӱҥлан мобилизоватлыме рвезе ден пӧръеҥ-влакын ешышт дене пашам ыштымаш шотлалтеш. Республик вуйлатыше Юрий Зайцевын кӱштымыж почеш регион-влак кокла гыч Марий Элыште ик эн ончыч социальный паспорт-влакым ышташ тӱҥалаш ойым пидме. Кызыт тиде опытым вес регионлаштат кучылтыт.
Республик вуйлатыше заседанийыште ончымо моло йодыш нергенат ойлен.
– 2025 ий гыч илышыш пурталтшаш национальный проект-влак Российысе регион-влаклан ончыкыжым вашталтышым ышташ у шӱкалтышым пуат. Президентын шындыме задачыже-влакым решатлаш мыланна посна ошкыл-влакым ямдылыман. Республикнан примерже денак каласен кертам: кызыт шукталтше нацпроект ден социально-экономический вияҥмаш индивидуальный программын лектышышт куандарат. Ятыр показатель шотышто Марий Эл Юл кундем федеральный округышто да элыштат ончыл верыш лектын кертын. Мемнан вий-куатна эше уло, – каласен Юрий Зайцев.
Марий Эл вуйлатышын пресс-службыжын уверже негызеш Л.Камалетдинова ямдылен
