Ветеранын суапле пашаже

5 сентябрьыште Курыкмарий районыш паша дене миен коштмыж годым Александр Евстифеев Пайскырык кыдалаш общеобразовательный школышкат миен савырнен. Республикыште ик эн ончыч почылтшо тиде школышто у тунемме ий вашеш спортивный залым олмыктеныт. Тылеч посна вургемым кудашме пєлемым, душевойым сайын келыштареныт, спортивный инвентарьым налыныт.

Туныктышо ден тунемше-влакын шонымашыштым илышыш шыҥдараш Марий Элым вуйлатыше Александр Евстифеев полшен. Тений республикыште тунемме ий вашеш 9 спортзалым олмыктымо. Тыгай спортзал радамыш Пайскырык селасе школат логалын. Тиде пашалан чылаже 19 миллион теҥгем ойырымо.

Шуктымо пашан качествыжым аклаш да тунемше ден туныктышо-влакым у тунемме ий тўҥалме дене саламлаш Александр Евстифеев шкежак миен коштын. Школын шумо сеҥымашыж нерген ойлышыжла, тудо туныктышо-влакын усталыкыштым палемден, нунын кокла гыч шукышт кўшыл да икымше квалификационный категориян улыт. Школ пытартыш ийлаште ятыр медалистым ямдылен.

Александр Евстифеев тунемше-влаклан тунемме ийым сайын эртараш, эреак ончыко каяш тыланен.

Республикым вуйлатыше вараже Виловат ял шотан илемыш пурышо Кожваж селаш миен коштын, тушто «Сеҥымашлан 70 ий» паркым ончен савырнен, верысе калык дене вашлийын. Тушто военно-мемориальный объектым 2015 ийыште ял калыкын вийже дене уэмденыт. Тиде пашам тўҥалаш пенсионер Леонид Моисеевич Иванов темлен, тудак олмыкташ кўлшє чоҥымо материалым шке оксаж дене налын. Тиде суапле пашаш вараже ял калыкат ушнен.

Александр Евстифеев Леонид Моисеевичлан тауштыман серышым кучыктен да паркым умбакыже тўзатыме йодыш Курыкмарий райцонын администрацийже кўкшытыштє ончалтеш манын ешарен.

Еҥ-влак дене вашлиймаште ял калыкым тургыжландарыше тўрлє кўлешан темым тарватыме. Эн ончычак корным олмыктымо да социальный инфраструктурым вияҥдыме йодыш-влакым каҥашыме.