Ветеран-влаклан медальым кучыктеныт

Илалше еҥ-влаклан наградым «Сталинград кредалмаш. Кугу Сеҥымаш лўмеш» тематический мероприятийым эртарыме годым Марий Элым вуйлатыше Александр Евстифеев ден Россий Федераций Федеральный Погынымашын Федераций Советыштыже республикысе кугыжаныш кучемын законодательный органжын представительже Сергей Мартынов кучыктеныт. Тыгай мероприятийже Юрино посёлкышто эртен.

Ветеран-влакым саламлен ойлымыж годым Александр Евстифеев тыге палемден: Россий Федерацийын президентше Владимир Путинын увертарыме Шарнымаш да чап идалык республикыште официально почылтын. Регионышто кызыт оборонно-массовый да военно-патриотический пашам шуктымо тылзе эртаралтеш. Тудым почмаште тўрлӧ муниципальный район гыч ик тўжем утла йоча участвоватлен.

Российын президентше мемнам Кугу Отечественный сар нерген, мемнан деч кайыше герой-влак нерген исторический чыным переген аралаш да тудын дене кушкын толшо тукым-влакым палдарен шогаш ўжеш. Тендан эртарыме тематический программе – самырык тукымым патриотизм шўлышеш шуарен куштымо пашан пеш кўлешан ужашыже, каласен Александр Евстифеев.

Марий Элыште военно-патриотический воспитаний дене авалтыме йоча-влаын чотышт эреак ешаралт толеш. Кызыт 100 наре кадет класс, 144 юнармейский отряд, 83 военно-патриотический клуб чылаже 8,5 тўжем утла еҥым ушен шогат.

Эртыше жап нерген шарнымашым арален шогымо жапыштак ме ончыкылыкым саемдышаш верч чулымын тыршена. Кодшо ийыште республик Россий президентын темлымыж почеш ямдылыме национальный проект-влакым илышыш шыҥдараш тўҥалын. Тиде пашаште Юрино районат ӧрдыжеш кодын огыл: «Образований» нацпроект почеш Горный Шумец тўҥ школын спортзалжым, «Культур» нацпроект почеш Юркино посёлкысо культур пӧртым капитально олмыктымо. Тылеч посна С.А.Лосев лўмеш Юрино кыдалаш школын актовый залжым олмыктымо, палемден Марий Элым вуйлатыше.

Вараже погынышо-влакым Федераций Советын Обороно да лўдыкшыдымылык комитетшын председательжын икымше алмаштышыже Сергей Мартынов саламлен ойлен.

Тылеч вара Марий Элым вуйлатыше Александр Евстифеев ден Федераций Советын Обороно да лўдыкшыдымылык комитетшын председательжын икымше алмаштышыже Сергей Мартынов ветеран-влаклан юбилей медальым кучыктеныт. Наградым налше-влак коклаште Нина Михайловна Барабанова, Мария Михайловна Голованова, Лев Михайлович Зобнин, Валентина Николаевна Зотина, Клавдия Алексеевна Меркурьева, Лидия Михайловна Паймеева, Анна Николаевна Пякшина, Михаил Александрович Сазанов, Александр Петрович Фуфыгин да Валентин Тимофеевич Яковлев лийыныт. Юрино районысо моло ветеранлан медальым мӧҥгыштышт кучыктат.