Марий Эл вуйлатышын пашажым жаплан шуктышо Юрий Зайцев палемден: верысе тӱҥалтыш дене кылдалтше проект-влак эн ончычак калыкын, тидын шотыштак ял-влакын, кӱлешан йодышыштым рашемдымашке да решатлымашке виктаралтыныт.
«Верысе тӱҥалтышлан бюджет велым полшышашлан ме шушаш ийын кок пачаш утларак оксам ойыраш палемденна. Тиде пеш кӱлешан да пайдале йӧн, сандене тудым шарен толман», – каласен Юрий Зайцев.
Октябрь мучаш марте Марий Элыште 44 проект шукталтшаш, увертарен республикын промышленность, экономике вияҥмаш да торговльо министржын алмаштышыже Михаил Полубарьев. Кызытеш верысе тӱҥалтышлан полшымо шот дене 22 проектым шуктымо да финансироватлыме – республик бюджет гыч проектлам ешарен финансироватлаш 9,2 миллион теҥге субсидийым ойырымо.
Палемдыме, шушаш 2023 ийлан проектлам конкурс шот дене ойырен налаш 2022 ий 1 февраль гыч тӱҥалме. Кызытсе жаплан тушко ушнаш 13 йодмаш пурен: 5 – Медведево, 4 – Советский, 2 – Шернур районласе илемла да 2 – Волжск ола округ деч.
Проект-влакын чумыр акышт – 9,5 миллион теҥге, тушечын 6,6 миллион теҥгежым субсидий шотеш йодмо. 2023 ийлан республик бюджетыште верысе тӱҥалтыш проект-влаклан 50 миллион теҥгем ойыраш палемдыме.
Марий Эл вуйлатышын пашажым жаплан шуктышо палемден: районла мучко кудалыштшыла, тушто илыше-влак дене вашлийме годым чӱчкыдынак тугай йодыш-влак лектыт, нуным верысе тӱҥалтышлан полшымо программе почеш писынрак да пайдалынрак решатлаш лиеш. Сандене тидлан тӱткышым утларак ойырыман.
Марий Эл Республикым вуйлатышын организаций да аналитике виктемжын уверже негызеш Ю.Исаков ямдылен
