Регион вуйлатыше Юрий Зайцев «Единый Россий» партийын республикысе пӧлкаже-влакын форумыштышт лийын.
Тудо Мер полышым пуышо штабыште эртен. Тушко партийын Кӱшыл Советшын членже, Федераций Совет председательын алмаштышыже Константин Косачёв, Федераций Совет Обороно, лӱдыкшыдымылык комитетшын председательжын икымше алмаштышыже Сергей Мартынов, депутат корпусын еҥже-влак, верысе первичный пӧлка-влакын секретарьышт погыненыт. Республикыштына 550 тыгай пӧлка пашам ышта. Нуно 14 тӱжем еҥым ушат.
Форумым почшыла, Юрий Зайцев нине пӧлка-влакын моткоч кӱлешан пашам шуктымыштым палемден. «Единый Россий» партийын председательже Дмитрий Медведев 2024 ийым первичный пӧлка-влакын идалыкышт семын увертарен. Нуно калык деч пурышо чыла темлымашым, наказым, йодышым мыланна колтат. Тидак лекше чыла тургыжландарыше йодышым регионым вуйлатыше-шамычлан писын решатлаш йӧным почеш. 29 февральыште Россий президент Федерал Собранийлан Посланийжым лудын. Тушто тудо лишыл жапыште элнан вияҥме тӱҥ корно-влакым палемден. А нунын дене кылдалтше чыла йодышым первичный пӧлка-шамычат, кугыжаныш орган-влакат, систематизироватлен, илышыште шотыш кондат», – каласен Юрий Зайцев.
Константин Косачев партийын пӧлкаже-влакын миссийыштлан акцентым ыштымым моткоч кӱлешанлан шотлен. Нунын верысе калык дене пашам ыштымышт сайлыше-влакын йодмыштым шукташ полша. Россий президентым сайлымашат сайын, законодательствын чыла йодмыжым шуктен эртымылан кугу ӱшаным ышта.
Сергей Мартынов президентын Посланийже нергенак мутым шуен. Посланийыште граждан-влакын социальный гарантийыштым илышыште шукташ, элнам аралаш, еш-шамычлан полшаш кӱлмӧ нерген ойлалтмым ушештарен. Первичный организаций-шамычын ончылеҥыштат федерал кӱкшытыштӧ шонен пыштыме чыла инициативе ден партий проект-влакым илышыш шыҥдараш полшат манын.
Марий Эл вуйлатышын пресс-службыжын уверже негызеш С. Носова ямдылен
