Марий Элым вуйлатыше Юрий Зайцев паша дене Китайыште лиймыж годым Ляонин провинцийым вуйлатышылан образований да туризм сферылаште вашкылым пеҥгыдемдыме шотышто темлымашым ыштен.
Шэньян олаште эртыше семинарыште тудо гуманитарный да экономике отрасльлаште Марий Элын куатше дене палдарен. Тушто мемнан республик дене образований, тӱвыра, туризм да промышленность областьлаште вашкылым кучымо шотышто мутланымаш лийын. Юрий Зайцев семинарыште лийше-влаклан Юл кундем кугыжаныш технологий ден Марий кугыжаныш университет-влак да нунын пашашт нерген каласкален.
«Тендан провинций гыч мемнан вузлаш самырык еҥ-влак физике, математике, химий, биологий, тыгак микроэлектронике направленийла дене тунемаш пурен кертыт. Тидын деч посна кылым шанче областьыште ышташ лиеш. Мемнан университетлаште шанче базе виян, тушто у разработко-влакым ямдылыме паша эртаралтеш. Вашкылым ышташ ямде улына», – каласен регионым вуйлатыше.
Вашлиймаште тыгак туризм сферыште кылым ыштыме шотышто мутланымаш лийын. Федераций Совет председательын алмаштышыже Константин Косачёвын палемдымыж почеш, Марий Эл ден Ляонин провинций коклаште ятыр икгайлык вашлиялтеш, сандене пырля пашам ыштымаште сай лектыш лиеш.
Ляонин провинцийысе Калык представитель-влак погынымашын постоянный комитетшын председательжын алмаштышыже Гун Фуцин верысе тунемме вер ден шанче-технический лабораторийла нерген каласкален. Кундемыште кӱшыл образованийым пуышо 114 тӧнеж, 1613 шанче шымлыме институт, 14 кугыжаныш лабораторий, 12 национальный шымлыме рӱдер улыт. Гун Фуцин Марий Эл дене образований сферыште вашкылым вияҥдаш ямде улмым палемден.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
