Канде тул республикысе ятыр пӧртыш толеш: районлашке газым пуртымо шотышто президент программе кузе шукталтме дене кылдалтше йодышым правительствыште каҥашеныт.
20 сентябрьыште Марий Эл вуйлатышын пашажым жаплан шуктышо Юрий Зайцев Россий Федераций правительстве председательын алмаштышыже Александр Новакын эртарыме совещанийышкыже ушнен.
Видеоконференцкыл йӧн дене лийше мутланымаште Александр Новак палемден:
– Тений идалык мучаш - 2023 ий тӱҥалтыш марте газым шупшмо илыме верлаште йодшо еҥ-влакын мланде участке чекышт марте газым намиен шуктыман. Россий Федерацийын президентше тыгай тӱҥ задачым шынден. Тачысе кечылан 1 миллионат 37 йодмаш уло. Пытартыш кок тылзе жапыште гына 100 тӱжемлан ешаралтын.
Марий Элыште тений 1 январьлан налмаште газ 84 % кумдыкыш миен шуын. 19 сентябрьлан догазификаций манме программыш 5807 йодмаш пурен. 340 илыме верлаште участке чек марте канде тулым колташ 2880 йодмашым шуктымо, тышеч 1223 вере тӱрыс пуртымо. Чылаже 4166 ойпидышым ыштыме. Тидыже 96 % лиеш. Паша палемдыме графикым ончылтен шукталтеш.
Ушештарена, 15 сентябрьыште Юрий Зайцев Санкт-Петербургышто эртыше XI тӱнямбал газовый форумышто «Газпром» ПАО правлений председательын алмаштышыже Виталий Маркелов да «Газпром межрегионгаз» ООО-н генеральный директоржо дене вашлийын. Нуно регионыш канде тулым пуртымо йодышым каҥашеныт. Марий Эл вуйлатышын пашажым жаплан шуктышын ойлымыж почеш, 2025 ий марте республикыште газификаций дене кылдалтше 17 кугу объектым чоҥаш палемдалтеш. Тудын тӱрыс кужытшо 260 километр лиеш. Тиде 58 илыме верыш газым пурташ да 14 котельным пӱртӱс газыш кусараш йӧным ышта.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
