Марий Эл правительствыште кугыжаныш национальный политике дене кылдалтше йодыш-влакым каҥашеныт.
Марий Эл Республикын Кугыжаныш национальный политике концепцийжым илышыш шыҥдарыме шотышто правительстве пеленысе комиссийын заседанийжым регион вуйлатыше Юрий Зайцев эртарен. Тушко правам аралыше орган, кӱшыл тунемме заведений вуйлатыше, правительстве член-влак, национальный мер организаций-влакын еҥышт погыненыт.
Юрий Зайцевын палемдымыж почеш, республикыште илыше калык-влакын тӱвыраштым, йылмыштым арален кодаш виктаралтше йодыш-влакым правительстве эре тӱткын эскера. Тидын дене кылдалтше йодыш-влак Российысе калык-влакын ассамблейыштын Марий Элысе пӧлкажын кумдаҥдыме заседанийыштыжат каҥашалтыныт. Россий президент шке Посланийыштыже самырык-влаклан кушкаш утларак йӧным ышташ, профессионал кадрым ямдылаш кӱлмӧ нерген ойлен. Санденак самырык-влак дене кылдалтше чыла йодышым эртарыме заседаний годым шотыш налаш темлен. «Ме нуным тӱрлӧ конфликтыш, деструктивный организацийлаш ушнымо деч утарышаш, келшен толшо профилактике мероприятийлам эртарышаш улына», – каласен тудо.
Марий Элын элкӧргӧ паша министржын алмаштышыже Алексей Коноваловын увертарымыж почеш, республикыште экстремизм шотышто оперативный обстановко начар огыл. Наций, конфессий-влак коклаште умылыдымаш дене кылдалтше экстремизм, терроризм сынан организаций-влаклан ошкылым ышташ пуымо огыл.
Республикысе Молодёжный политике комитет председатель Станислав Игошинын палемдымыж почеш, молодёжный политикыште ик эн тӱҥ вер тыгак наций ден конфессий-влак кокласе кылым пеҥгыдемдымылан ойыралтеш, самырык-влакын организацийышт коклаште экстремизм койыш ынже палдырне манын, профилактике паша эртаралтеш. Ты шотышто гына 49 мероприятий лийын, тушко 90 тӱжем еҥым ушымо.
Марий Эл вуйлатыше наукым да Российысе традиционный духовно- нравственный поянлыкым пропагандироватлыше, педагог ден тунемше-влаклан полышым пуышо, Шочмо элым йӧраташ, калык-влак кокласе кылым пеҥгыдемдаш виктаралтше проект-влакым илышыш утларак шыҥдараш кӱштен.
Марий Эл вуйлатышын пресс-службыжын уверже негызеш С. Носова ямдылен
