Марий Эл вуйлатыше Юрий Зайцев тенийысе вӱдшор пагытыште вӱд йымаке логал кертше кумдыклам кӱшыч ончал савырнен.
Республикыште вӱдшор икшырымын эрта. Утыжым вӱд нӧлталалтме сӱрет лийын огыл. Ты шотышто ситуацийым Марий Эл Правительстве, вуйын шогышо ведомство-влак тӱткын эскерат.
Эн чот вӱд ташлыме кечыже 8 апрельлан логалын, кодшо ийысе дене таҥастарымаште 9 кечылан эррак. Туге гынат вӱд кодшо идалыкысе деч 30 сантиметрлан шагалрак нӧлталалтын.
Ынде вӱдын пучымыжым эскераш гына кодеш. Кеч ты сӱрет вашталтынат кертеш: я игече иканаште левешта, я йӱр утларак йӱраш тӱҥалын кертеш.
Регион вуйлатышын палемдымыж почеш, ты пагытыште эн ончыч калыкын лӱдыкшыдымылыкшӧ нерген шоныман.
Марий Эл вуйлатышын пресс-службыжын уверже негызеш С. Носова ямдылен
