«Мемнан чыла пашана – калыклан, сандене тудын дене вашкылым ышташ да мом шонымыжым палаш кӱлеш», – «Диалог Регионы» АНО-н организоватлыме семинарыштыже исполнительный кучем да верласе шкевиктем орган-шамычын вуйлатышыштлан манын Марий Элым вуйлатыше Юрий Зайцев.
Палемдыме мероприятий министерстве, ведомство да муниципалитет пашаеҥ-влаклан калык дене вашкылым пеҥгыдемдыме, вашмутланыме йӧным каҥашыме да эн сай практике дене палдарыме шонымаш дене эртен.
«Кучем орган-влак ден калыкым ваш ушышо кӱлешан ужашлан Регионым виктарыме рӱдерым шотлем. Мыланем тудо калык дене вашкылым ышташ, тудын вуйшиймашыж ден обращенийжым эскераш, нунын шотышто келшыше пунчалым лукташ полша. «Диалог Регионы» АНО чыла регионышкак огыл мия. Каҥашым колаш, пашаштына мом тӧрлаташ кӱлмым палаш пайдале», – манын Ю.Зайцев.
Семинар годым палемдыме: тений пел талук жапыште Регионым виктарыме рӱдер кучем дене кылдалтше 20 тӱжем уверым пеҥгыдемден, ӱмаште тыгаяк жапыште – 14 тӱжем уверым. Калык ведомство-шамыч дене интернет гоч мутланыме йӧнлан утларак ӱшанаш тӱҥалын.
Калык социальный кыл-влакын полшымышт дене Марий Элысе кугыжаныш орган-шамычын 1188 официальный лаштыкышкышт возен кертеш. «Диалог Регионы» АНО-н вуйлатышыже Кирилл Истоминын мутшо почеш, кучемын соцсетьлаште улмыжо – увер кумдыкышто пашам ышташ кӱлшӧ йӧн, молан манаш гын Марий Элыште илыше 56 процент еҥ уверым соцкыл, тӱҥ шотышто ВКонтакте, гоч пален налеш. Сандене кугыжаныш тидым шотыш налшаш да вашкылым саемдышаш.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
