Ушан, виян, поро, ончыко ошкылшо…

3 октябрьыште Туныктышын кечыж вашеш Марий Эл Правительстве пӧртыштӧ регионым вуйлатыше Александр Евстифеев ик эн уста педагог-влакым пайрем дене саламлен да наградым кучыктен.

«Кажнын йӧратыме туныктышыжо уло. Лач тудо мемнан шӱмеш ӱмырешлан келге кышам коден да ончыкылык илыш корным ойыраш полшен. Педагогын профессийже нигунамат шке кӱлешлыкшым йомдарен огыл да ончыкыжымат тудо кеч-могай жапыштат тыгаяк лийын кодеш. А мемнан республикыште тыршыше туныктышо-влак ушан, кугу вий-куатан, поро, эре ончыко ошкылаш тыршыше улмышт дене ойыртемалтыт», – каласен тудо.

Тиде кечын Александр Евстифеев кундемнан образований системыштыже – таче тушто 10 тӱжем наре еҥ пашам ышта – ик эн виян, опытан педагог-влаклан сулен налме наградыштым кучыктен.

«Марий Эл Республикысе образованийын сулло пашаеҥже» лӱм дене ты гана кум еҥ палемдалтын: Татьяна Дьяконова (Йошар-Оласе 65-ше №-ан «Незабудка» йочасадын воспитательже), Елена Земскова (Йошкар-оласе 14-ше №-ан гимназийын туныктышыжо), Надежда Михайлова (Моркысо 6-шо №-ан кыдалаш школын туныктышыжо).

Марий Эл Правительствын Чап грамотшо дене палемдалтыныт: Сергей Григорьев (Морко районысо Унчо кыдалаш школым вуйлатыше), Ольга Костюнина (Советский посёлкысо 3-шо №-ан кыдалаш школ), Геннадий Орлов ( Медведево районысо автодорожный техникумын туныктышыжо).

Марий Элым вуйлатышын Тауштымашыжым кучыктеныт:  Оксана Васениналан (Семёновко селасе 21-ше №-ан кыдалаш школын туныктышыжо), Лариса Голобородьколан (Медведевысе 2-шо №-ан йочасадын воспитательже), Наталья Садовиналан (Йошкар-Оласе 4-ше №-ан кас школын туныктышыжо), Юрий Сельдюковлан (Семёновскысо интернат-школын туныктышыжо) да Елена Карташовалан (Марий кугыжаныш университетыште кафедрын заведующийже).