Курыкмарий район Тышнал ялыште фермер Сергей Кандишкинын озанлыкше негызеш регион кокласе Пасун кечыжым эртарыме.
Фермерын тыршымыжлан да кугыжаныш полышлан кӧра еш пареҥгым да тыглай йыраҥыште пакчасаскам ончен куштышо ончыл ялозанлык предприятийыш савырнен. Кодшо ийын озанлык 4,9 миллион теҥге кугыжаныш полышым налын.
Марий Элым вуйлатышын пашажым жаплан шуктышо Юрий Зайцев тыгай кугу мероприятийыш толде кертын огыл, вет агропромышленный комплекс республикым вияҥдымаште ик рӱдӧ верым айла.
– Район пареҥгым ончен куштымо шотышто икымше верым айла, пакчасаскам тыглай йыраҥыште куштымо дене – кокымшым. Тиде озанлыкыште кажне гектар гыч кокла лектыш – 500 центнер. Республикым да пӱтынь элым пукшымыштлан чылаштлан тауштем, – каласкен Юрий Зайцев.
Татарстан Республикын премьер-министржын алмаштышыже, ялозанлык да кочкыш сату министр Марат Зяббаров тиде мероприятийыш ӱжмыжлан Юрий Зайцевлан тауштен да кызыт селекцийлан кугу тӱткыш ойыралтмым палемден.
– Шкенан элысе пакчасаска ден пырчан культурын селекцийышт – моткоч кӱлешан паша, поснак кызытсе жапыште. Тидлан федерал, тыгак регион могырым кугу полыш пуалтеш. Ме ты шотышто ятыр ыштена, – каласен Марат Зяббаров.
Регион кӱкшытан Пасун кечыштыже ӱяҥдышым, оборудованийым, урлыкашым конден шогышо кугу компаний-влак шке сатуштым ончыктеныт, сандене мероприятий Юл кундемысе ялозанлык предприятий-влакым вияҥдыме, опытым шарыме шотышто пайдале лиеш.
Марий Элым жаплан вуйлатыше техникым, выставкым ончен савырнен, урлыкашым, кушкылым аралыме средствам, минералный ден биологический ӱяҥдышым конден шогышо да селекционер-влак дене мутланен.
«Поиск» агрохолдингын селекций службыжым вуйлатыше Александр Ховрин каласен: Марий Эл правительстве регион кӱкшытыштӧ российысе сорт ден гибридым шыҥдараш полшышо икымше кундемлан шотлалтеш. Тыштыже республикын Ялозанлык да кочкыш сату министерствыжын тыршымыжым палемдыман.
Юрий Зайцев тыге каласен: селекцийым вияҥдыше, урлыкашым ямдылыше предприятий-влаклан ончыкыжымат полыш пуалташ тӱҥалеш. Вет ты пашаште мемнан йӧнна шагал огыл.
Марий Эл Республикым вуйлатышын организаций да аналитике виктемжын уверже-влак негызеш В.СМОЛЕНЦЕВ ямдылен
