Унам пайремыш ўжын

Вел-влак торгово-экономический  кылым  пеҥгыдемдыме йодышым каҥашеныт,  образований ден культур сферыште интересын икгай улмыжым рашемденыт да умбакыже пырля пашам ыштыме корным палемденыт.

Почетан унам саламлен ойлышыжла, Александр Евстифеев пытартыш ийлаште  Марий Эл ден  Казахстан коклаште сатум ваш-ваш ужалымаш ешаралтын, но пырля пашам ыштен кертме йӧн але тичмашын огыл кучылталтеш манын  каласен.

Генконсул посольствын делегацийжым порын вашлиймылан  тауштен, толын коштмын цельже дене палдарен да республикым ончен коштмо деч вара шочшо шонымашыж  нерген ойлен.

Марий Элысе вузлаште  тўнясе 35 эл гыч, тидын шотыштак  Казахстан гыч, толшо студент-влак тунемыт. Тидыже, генконсулын шонымыж почеш,  республикыште образованийын кўлешан да кўкшӧ качестван улмыжым ончыкта. Тыгай кылым  пеҥгыдемдаш кўлеш.  Казахстанысе вуз-влакым тендан дене, Марий Элысе вуз-влакым мемнан дене пропагандироватлаш келшен толеш, каласен уна.

Мемнан дене медицине факультет чулымын пашам ышта. Тыштат пырля тыршаш йӧн уло, палемден Марий Элым вуйлатыше.

Александр Евстифеев  Россий ден Казахстан коклаште келшен илыме кыл шукерте ожнак шочын да пеҥгыдемын манын ешарен да Жанболат Мурзалиным Кугу Отечественный сарыште  Сеҥымашлан 75 ий теммым да Марий Элын 100 ияш лўмгечыжым  пайремлымашке толаш ўжын.