Уна-влаклан чыла шотыштат йӧным ыштыме

Инвалид-влакын III всероссийский кеҥеж спартакиадыштын эртымыжым Марий Эл вуйлатыше Александр Евстифеев шкежак эскера. Кодшо кечылаште Правительстве пӧртыштӧ   тудым эртарен колтымо шотышто оргкомитетын погынымашыже лийын. Тушто икмыняр кечым иктешленыт, участник-влакым тургыжланадарыше йодыш-влакым (кочмо, илыме, медполышым пуымо шотышто) каҥашеныт.

Молодежный политике, спорт да туризм министр Лидия Батюкован палемдымыж почеш, участник-влак-влак вузын 9 тӱшкагудыштыжо илат. Нуным иктаж йодыш тургыжландара гын, организатор-влак вигак кораҥдаш тыршат.

- Спортсмен-влакын родо-тукымыштат тӱшкагудыштак илат, кочкаш коштмо, таҥасымашым ончаш пурашат нимогай нелылык уке, - каласен Лидия Батюкова. - Лӱдыкшыдымылык шотыштат тургыжланыман огыл, кажне спорт объектыш Росгвардийын пашаеҥже-влак ончен пуртат, МЧС ден МВД пашаеҥ-влак калыкын тӱшкан погынымо верыште, тӱшкагудышто дежуритлат.

Спартакиаде жапыште тоштерлашке кажне кумылан еҥ яра пурен кертеш. Каныш кечылаште экскурсий дене тушко спортсмен-шамычат, тыглай калыкат ятыр миеныт, - палемден Марий Эл Правительстве председательын икымше алмаштышыже Михаил Васютин.

Тазалыкым аралыме шотышто министр Марина Панькова медперсонал-влакын дежуритлымышт нерген ойлен. Тудын палемдымыж почеш, полышым йодын мийыше икмынярын лийыныт.

- Спортсмен-влаклан йокрок ынже лий манын, тӱшкагудын кажне пачашыштыже телевизорым келыштаренна, тыгак 9 гыч 18 шагат марте кажне кечын Сергей Карякинын шахмат школышкыжо мияш лиеш, - каласен МарГУ-н ректоржо Михаил Швецов.

«Волгатехын» тўшкагудыштыжо илыше-влакымат нимо ок тургыжландаре. Тушто чылажымат эскерат, спортсмен-влаклан ласка лийже манын, чыла шотыштат йӧным ыштат. Тидын нерген «Волгатехын» ректоржо Виктор Шабашев ойлен.

Йошкар-Олан мэрже Евгений Масловын палемдымыж почеш, оласе чыла службо тыршен пашам ышта, шӱкшакым жапыштыже кора‰дат, оласе урем ден каныме кумдык-влакым кажне кечын эрыктат.

- Ыштышаш пашана моткоч шуко, а эн тӱҥжӧ – таҥасымаш-влакым кугу кӱкшытыштӧ эртарышаш улына. Сандене кажне вуйлатыше ӱмбалне  - кугу ответственность, -  докладым ямдылыше-влакым колыштмеке иктешлен Марий Эл вуйлатыше.