Марий Эл Запорожский областьыште шефствыш налме Куйбышев районлан умбакыже полша.
Республикым вуйлатыше Юрий Зайцев Россий Федераций правительстве председательын алмаштышыже Марат Хуснуллинын эртарыме совещанийыште видеоконференций йӧн дене участвоватлен.
Заседанийыште ДНР-ыште, ЛНР-ыште, Херсон да Запорожский областьлаште верланыше илем-влакым шотыш кондымо йодышлам каҥашеныт.
Марий Эл Запорожский областьыште шефствыш налме Куйбышев районлан умбакыже полша. Тудым 2024 ийыште шотыш кондаш 138 миллион утла теҥгем ойырымо.
Тений вӱдым ситарыме да тазалык аралтыш объект-влакым нӧлташ палемдыме. Тыгак тиде пашам шукташ спецтехнике ден чоҥымо да йӱлышӧ-шӱрымӧ материалым налыт. Тылеч посна, калыклан йӱшаш вӱдым, районысо библиотеке ден тӧнеж-влаклан книгам, школ ден дошкольный организацийлашке кӱмыж-совлам намийыме. Майыште врач-шамычын бригадышт калыклан медосмотрым эртараш да медицине полышым пуаш кая.
Марий Эл Запорожский областьысе Куйбышев районым ӱмаште майыште шефствыш налын. Пашам пырля ыштыме нерген ойпидыш дене келшышын, регионна гыч мийыше чоҥышо-влак элнан у кумдыклаштыже шалатыме школ, йочасад, эмлымвер-влакым шотыш кондат. Республик гыч гуманитар полышым колтат. Куйбышев районысо йоча-влаклан Марий Элыште канаш йӧным ыштат.
Марий Элым вуйлатышын пресс-службыжын уверже негызеш М.ИВАНОВА ямдылен
