Марий Эл специальный военный операцийыште задачым шуктышо военнослужащий-шамычлан умбакыжат полышым пуа.
10 апрельыште регион вуйлатыше Юрий Зайцев республик гыч специальный военный операцийыште участвоватлыше боецна-влаклан колтышаш черетан гуманитар полышым терген лектын. Мо кӱлешым поген колтымо шотышто «За Марий Эл» поро кумылым ончыктышо фондын тыршымыжым палемден. Тудыжым ӱмаште регион вуйлатыше ден Марий Эл правительствын тӱҥалтышыж дене ноябрьыште ыштыме.
Ты гана специальный военный операций кайыме верыш колташ обмундированийым, йолчиемым, генератор ден специальный оборудований-влакым да моло чот кӱлешым вич автомобильыш погеныт.
– Передовойышто улшо воинна-влаклан чыла гаяк кӱлешым чумырымо. Тудым спецопераций кайыме кумдыкыш колтена. Калыкнан боецна-шамычлан мо кӱлешым колташ эреак ямде улмыжым эше ик гана пеҥгыдемдем. Тыгак кундемыштына улшо тӱрлӧ предприятий ден предприниматель-влак ӧрдыжеш огыт код. Тау чылаштлан, уло кумылын воинна-шамычлан полшымыштлан. Ме элнам аралыше патырна-влаклан пырля полшышаш улына, – манын республик вуйлатыше.
Тудо тыгак республикысе бюджет гыч шерге оборудованийлан: квадрокоптерлан, тепловизорлан, детекторлан, дроным пытарышылан, радиооборудованийлан – окса ойыралтеш манын.
«За Марий Эл» поро кумылым ончыктышо фонд чылажымат воинский частьласе командир-влакын йодмышт почеш пога. Лач йодмо верыш кӱлеш полышым колтат. Тыгак ты фонд боец-шамычлан адрес дене личный посылкым колта. Тачысе кече марте тушеч куд гуманитар полышым колтымо. 19 автомобильым, автозапчастьым, блиндажым чоҥаш материалым, медикаментым, вургемым, йолчиемым, салтак-влаклан серышым намиен шуктымо.
Тыгак кӱлеш полышым госпитальлаш, йочапӧртлаш да у субъектлаште илыше-шамычлан колтат.
Марий Эл вуйлатышын пресс-службыжын уверже негызеш Е. Эшкинина ямдылен
