Угыч толын кошташ кумылаҥже

5 сентябрьыште Республикын правительствыже Козьмодемьянск олаште А.В.Григорьев лўмеш художественно-исторический музейыште верыш лектын коштмо заседанийым эртарен. Тушто республикын инфраструктурыжым, транспортшым, туристический ден культурный куатшым вияҥдыме йодышлам каҥашеныт.

Погынышо-влакым саламлен ойлышыжла, Александр Евстифеев тыгай вашлиймаш республикын курымаш лўмгечыжлан ямдылалтме да тиде чапле музейлан 100 ий теммым палемдыме жапыште туризмым вияҥдыме темым каҥашаш сай йєным пуа манын каласен. Марий Элым вуйлатыше тыгак олан сай велышкыла вашталт толмыжым палемдыде коден огыл.

Александр Евстифеевын мутшо почеш, Марий Элыш турист-влак утларак да утларак шукын толын коштыт. Теве тений икымше пелийыште гына 425 тўжем еҥ толын каен. Но тидын дене серлагыман огыл, сандене республикыште услуго сферым да унагудо озанлыкым вияҥден толман. Толын коштшо турист-влакын чотышт шукемже манын шонена гын, республик уна-влакым сайын вашлийшаш да обслуживатлышаш, нунылан канашышт чапле условийым ыштышаш. Турист уэш толын кошташ кумылаҥын кайышаш, палемден Александр Евстифеев.

Марий Элым вуйлатышын шонымыж почеш, Козьмодемьянскыште портым вияҥдыме пашалан кугу тўткыш ойыралтшаш. Шуко турист Юл эҥер корно дене толеш. Кодшо ийыште оласе портыш 193 судно пурен, тидыже 2016 ийысе деч 70 процентлан шукырак. Порт утларак пайдалын да турист-влаклан сай йєным пуэн пашам ыштыже манын, умбакыже мом ышташ лиймым шоналтышаш улына, палемден республикым вуйлатыше.

Козьмодемьянскын мэрже Михаил Козлов докладыштыже олаште лийын шогышо вашталтыш нерген каласкален.

Республикын молодёжный политике, спорт да туризм министрже Лидия Батюкова кызыт «Край звонких гуслей» инвестиционный проектым ямдылыме нерген ойлен. Тиде проектым шукташ 540 миллион теҥге кўлеш лиеш. Чыла тидыжым Марий Эл Республикым 2019-2024 ийлан социально-экономически вияҥдыме индивидуальный программыште шотыш налме.

Республикын культур, печать да национальность паша шотышто министрже Константин Иванов докладыштыже турист-влакын кумылыштым мелын савырен кертмаште музей-влакын шагал огыл ыштен кертмыштым палемден.

Транспорт да корно озанлык министрын пашажым шуктышо Александр Желонкин транспортно-логистический комплексым вияҥдыме нерген ойлен, тидын годымак Козьмодемьянск олаште причалын инфраструктурыжым уэмдаш кўлмым палемден. Чыла тиде пашам, каласен тудо Марий Эл Республикым 2019-2024 ийлан социально-экономически вияҥдыме индивидуальный программын проектышкыже пуртымо.

Марий Элым вуйлатыше Юлышто паромно-пассажирский причал-влакым ыштыме йодышым келшен толшо министерстве, муниципальный образований-влакын вуйлатышышт дене каҥашаш кўштен, тидын годым промышленный туризм нергенат мондыман огыл, каласен тудо. Марий Элым вуйлатыше Юлын пундашыжым эрыктыме да серым пеҥгыдемдыме йодышлан кугу тўткышым ойыраш кўштен.

Марий Элын пўртўс ресурс, экологий да йырым-йырысе средам аралыме шотышто министрже Алексей Киселёв пеҥгыде бытовой шўкшакым погышо региональный операторын пашажым кокымшо зонышто виктарен колтымо нерген каласкален.

Промышленность, экономический вияҥмаш да торговльо министр Дмитрий Пугачев Козьмодемьянсклан моногород улмо статусшо вияҥаш могай йєным пуэн кертме нерген ойлен. Россий Федерацийыште  «Моноола-влакым вияҥдыме фонд» ышталтын. Козьмодемьянсклан полыш лач тиде фонд гыч ойыралтшаш. Фонд федеральный бюджет гыч финансироватлалтеш. Тидыже Козьмодемьянск олан инфраструктурыжым вияҥдымашке ешартыш оксам ушаш йєным пуа.

Александр Евстифеев Дмитрий Пугачевлан Козьмодемьянскын администрацийже дене пырля тений 1 декабрь марте фондын еҥже, олаште илыше калык дене вашлияш да вашлиймашын результатше нерген Марий Эл Правительствын заседанийыштыже увертараш кўштен.

Чапле юбилейлан кєра Александр Евстифеев А.В.Григорьев лўмеш художественно-исторический музейлан автобусым налаш сертификатым кучыктен. Тудо тыгак Козьмодемьянскысе культурно-исторический музей-комплексын ойыртемалтше пашаеҥже-влаклан наградым кучыктен. Национальный культур отделын кугурак научный пашаеҥже Алевтина Акцориналан да культур наследий объект-влакым арален кодымо да нунын дене калыкым палдарыме сенкторым вуйлатыше Александр Фирсовлан «Марий Эл Республик культурын заслуженный пашаеҥже» почётан лўмым пуымо.

Музей пашам вияҥдымашке надырым пыштымыжлан Марий Эл Правительствын Почётан грамотыж дене учёт да аралымаш отделым вуйлатыше Оксана Кораблёва палемдалтын. Художественный вуйлатыше Ирина Якимычевалан Марий Элым вуйлатышын тауштымашыжым увертарыме.