Республикышсе сатум ыштен налше да услугым пуышо лу предприятий тиде ганат сай качестван да лӱдыкшыдымӧ сатум ямдылымыжым ончыктен. Эше кум предприятий 2022 ийыште «Марий Эл Республикыште наставничествын эн сай практикше» региональный конкурсышто ончыл верым налын.
Регион вуйлатыше Юрий Зайцев Образований да науко министерствын залыштыже «Российын эн сай 100 сатужо» Всероссийский конкурсын лауреатше ден дипломантше да «Марий Эл Республикыште наставничествын эн сай практикше» региональный конкурсышто сеҥыше-влаклан наградым кучыктен.
«Промышленность сферыште продукцийым ыштен налме шотышто эн сай лектышыш шумым да услугым пуымым ончыкташ ий еда конкурсым эртарымаш сай йӱлашке савырнен. Конкурсышто участвоватлымыда качествым семдыме, рынкыште поснак ойыртемалтше темлымашым ыштымыда ешаралтме, республикыштына наставничествын пайдале практикшым шарыме шотышто чулым улмыдам ончыкта», – погынышо-влак ончылно каласен Юрий Зайцев.
Регион вуйлатыше палемден: промышленность ден ялозанлык – республикнан эн тӱҥ отрасльышт улыт, а Всероссийский конкурсын дипломжо-влак предприятий-шамычын кугу вий-куатышт нерген ойлат. Касвел эл-влакын санкцийыштым ончыде, нунын кокла гыч шукышт лукмо продукцийыштын ассортиментыштым кумдаҥден толыт да ярсыше верым ӱшанлын айлат.
«Наградым да кӱкшӧ акым налмек, чарнен шогалаш ок кӱл. Республикын правительствыже субсидий дене полшаш да тендан бизнесдам умбакыже вияҥдыме шотышто мутланаш ямде. Тендан пашада республиклан пайдам конда манын ӱшанена», – ешарен республикым вуйлатыше.
Юрий Зайцев палемден: республикысе сатум ыштен налше-влакнан вияҥаш да ужалыме рынкым кумдаҥдаш келшыше чыла ресурсышт уло.
«1-ше №-ан кинде завод» ООО директор Ольга Сурдина Марий Эл вуйлатышылан сатум ыштен налше-влакын пашаштым кӱкшын аклымылан да торжественный мероприятийым организоватлымылан тауштен.
«Тыгай полыш мемнам утларак сайын тыршаш, кеч-могай ситуацийыштат вияҥаш кумылаҥда», – каласен Ольга Сурдина.
«Российын эн сай 100 сатужо» 2022 ийысе Всероссийский конкурсышто сеҥышыш лектыныт: «Чай Руси», «Звениговский» шыл комбинат», «Микряково» ООО-влак, «Геникс» научно-производственный фирме, «Марий силикат кермыч завод» ЗАО, «РАДАКС» ООО, «Полаир-Недвижимость» АО, «Марий картонажный мануфактура», «ФАРБ-М» кугыжаныш огыл (частный) оролышо предприятий» ООО-влак, «Марий Эл Республикыште паша лектыш сферыште региональный компетенций рӱдер» коммерческий огыл автономный организаций.
«Марий Эл Республикыште наставничествын эн сай практикше» 2022 ийысе региональный конкурсышто сеҥышыш лектыныт: «Чоҥаш» ООО, «Автомобиль фургон-влак Красногорский комбинат» АО, «1-ше №-ан кинде завод» ООО.
Марий Эл Республикым вуйлатышын администрацийжын
информаций паша пӧлкажын уверже негызеш В.СМОЛЕНЦЕВ ямдылен
