Оршанке районыш мийымыж годым республик вуйлатыше Юрий Зайцев райрӱдыштӧ Ӧрша эҥерыште гидротехнический сооруженийым капитально олмыктымо паша кузе кайымым ончен савырнен. Тушто 2022 ий кеҥежым плотинам вӱд пӱчкын каен улмаш. Марий Эл вуйлатыше Юрий Зайцевын кӱштымыж почеш ӱмаште ноябрьыште ты верыште уэмден тӧрлатыме пашам тӱҥалыныт.
Кызытсе жаплан пужымо пашам шуктеныт, вӱдым чумырышо сооруженийым вераҥдаш фундаментлан верым келыштареныт, икмыняр молым ыштеныт. Ончыкыжым пӱян кок сержым пеҥгыдемдаш да тӱзаташ палемдалтеш.
Пашам шуктымо годым пӱя пундашым эрыкташ да келгемдаш кӱлмӧ рашемдалтын. Молан манаш гын йымалже тӱрлӧ кушкыл дене «леведалтын». А тиде – Оршанке поселкышто илыше еҥ-влаклан йӱштылаш келыштарыме улыжат ик вер гына. Сандене тидлан, тыгак пожарым йӧрташ вӱдым налаш нелылыкым ышта. Эрыктыме пашам шукташ Оршанке муниципал районлан ешартыш оксам полышым ойырыман.
Гидроузелым ачалыме шотышто шуктымо пашам ончен лекмеке, республик вуйлатыше палемден: вӱдшор жапыште кумдык-влакын вӱд йымаке кайымышт марте шуктыман огыл. Тидын дене кылдалтше йодыш кызыт ик эн тӱҥ лийшаш.
– Тиде объект еҥ-влакын лӱдыкшыдымылыкышт дене кылдалтын, сандене чыла паша кӱлеш семын шукталтшаш, – каласен Юрий Зайцев.
Марий Эл вуйлатышын пресс-службыжын уверже негызеш Л. Камалетдинова ямдылен
