Марий Элым вуйлатыше Юрий Зайцев республикын сообществыжым Россий наукын кечыж дене саламлен. 8 февральыште тудо Юл кундем кугыжаныш технологий университетыште XIV Науко фестивальым почмаште лийын.
«Марий Элын кугу куатан научный потенциалже уло. Мемнан учёный-влакын шымлымашышт увер, телекоммуникаций, радиоэлектрон системе да технологий, энергетике, машиностроений, чоҥымаш, биотехнологий, пӱртӱсым пайдалын кучылтмо областьлам кумдан авалтат. Икмыняр кугыжаныш научный да инвестиций фондлан полышым пуымылан кӧра нуно тачысе илышнам лӱдыкшыдымым, йӧнаным да жаплан келшышым ышташ манын, кӱлешан разработкым ямдылен кертыт», – саламлымыж годым каласен регионым вуйлатыше да кугу сеҥымашыш шушо-влаклан наградым кучыктен.
Ты кечын тудо самырык учёный-шамычын ушемыштын, студент научный сообществын чолга еҥже да Марий Элым вуйлатышын грантше ден стипендийжым налше-влак дене вашлийын.
«Таче ме Россий наукын кечыжым палемдена. Ты гана тудо мемнан эллан поснак кугу событий: тений Россий Науко академийлан – 300 ий. Шуко курымла дене шымлыме паша-влакым посна ойыраш неле, вет нунын деч посна кызытсе сеҥымашыш шуын огына керт ыле. Науко эре лийын. Таче тыште тудын чыла отрасльже гыч еҥ-влак погыненда: кӱкшӧ технологиян направлений гыч тӱҥалын чодыра да ялозанлык-влак марте. Те, учёный, уым шонен лукшо, шымлызе-влак, мемнан элын ончыко наҥгайыше вийже, уш-акыл куатше улыда», – каласен Юрий Зайцев.
Вашлиймаш годым учёный-влаклан полышым пуымо да научный сферым вияҥдыме дене кылдалтше йодышлам каҥашеныт. Юрий Зайцев палемден: лач науко пашаеҥ-влакын тыршымыштлан кӧра технологий вияҥеш, калыкын илышыже саемеш да элнан суверенитетше пеҥгыдемеш.
Марий Эл вуйлатышын пресс-службыжын уверже негызеш Г.Кожевникова ямдылен
