У школыш у шонымаш дене!

​Вӱргечын Параньга район Элпанур ялыште у школ шке омсажым почын. Ты кечын тушто Марий Эл Республик вуйлатыше Александр Евстифеев лийын.

Верысе калык тиде татым шукертсек вучен. Конешне, тошто школ кажне выпускникшылан да кызытсе тунемшыжлан шерге, туге гынат тачысе жапын йодмашыжым ок шукто. Тидланже ӧрман огыл, вет тудлан 90 ият темеш – пу оралтым эше мӱндыр 1929 ийыштак чоҥымо. Тымарте йоча-влак кочкаш вес корпусыш коштыныт, а канализаций да вӱд пурымо шотышто ойлыманат огыл.

У школым эше 2016 ийыштак чоҥаш тӱҥалыныт, но окса укелан кӧра чоҥымо паша чарнен шогалын. Вес ийын августышто регион вуйлатыше паша дене Параньга районышто лийын, тунам верысе муниципальный образований администраций пашаеҥ-влак тиде моткочак кӱлешан объект шотышто мутым тарватеныт, а идалыкат пеле гыч 116 веран (тоштышкыжо 83 йоча гына коштын кертын) у школым  нӧлтенат шынденыт. Ынде тыште Марий Сеснурышто, Пумарий почиҥгаште (Оби-Памаш) да Изи Пумарий почиҥгаште (Котяминер)  илыше ӱдыр-рвезе-влакланат тунемаш йӧн лектын, нуным занятийлаш школ автобус шупшыкташ тӱҥалеш. Чоҥаш средствам – чумыр налмаште 148,8 миллион теҥгем – федерал, регион да район бюджетла гыч ойырымо. 

Школым торжественно почмаште Александр Евстифеев палемден: кызыт республикыште образованийым пуымо йодышлан кугу тӱткыш ойыралтеш. Ӱмаште гына, мутлан, 5 йочасадым почмо.

«Тений регион 40 школ автобус дене пойдаралтын. Тыгайже ик ганат лийын огыл. Кажне йоча школышто тунемшаш, сандене тидлан чыла йӧным ыштыман», – палемден республик вуйлатыше.

У тунемме верыштат образованийым налаш чыла йӧным ыштыме. «Физике», «Химий», «Информатике», «Биологий» кабинет-влак кӱлеш оборудованиян улыт. Тӱҥалтыш класслаште тунемше-влаклан каныме пӧлемлам келыштарыме. Кочкаш ынде вес оралтыш ошкылман огыл – столовый волгалтеш. Актовый да спорт зал-шамычат жаплан келшыше улыт.  Александр Евстифеев «Домоводство» кабинетыште ургымо машина-шамычым терген (снимкыште), «Информатике» кабинетыште Интернетын «писылыкше» шотышто йодышым пуэн.

«Сай образованийым пуаш чыла йӧн уло. Тыге рӱдолаште веле огыл, яллаштат лийшаш, – каласен регион вуйлатыше да общий образований базеш лӱмынак курс-влакым (мутлан, ургымо паша але вычислительный технике дене кылдалтше паша) почмо шотышто темлымаш ойым луктын. Тыгай курсым эртыше выпускник ончыкыжым пашаверымат писын муын кертеш манын ойлен.  

А мучашлан палемден: «Йоча-влак дене кылдалтше паша ик эн неле, но Элпанур школын туныктышыжо-влак тудым кӱлеш семын шуктат».