У школ яндар юж семынак кӱлеш

Марий Элым вуйлатыше Александр Евстифеев Йошкар-Оласе 9-В микрорайонышто чоҥалтше у школым чоҥымаште лийын.

Йоча-влаклан образованийым пуымо тиде вер шке омсажым 2020 ий 1 сентябрьыште почшаш, санденак тудым кузе чоҥымым регион вуйлатыше тӱткын эскера да терга. Адакшым микрорайонат кушкеш, санденак тушто илыше ача-ава-влаклан кызыт йочаштым моло районыш шупшыкташ логалеш. Икманаш, школ тыште яндар юж семынак кӱлеш.

Подрядный организацийын чоҥымо цехшым вуйлатыше Владимир Чуйковын мутшо почеш, таче кечылан объект 40 процентлан ямде. Кызыт пашаеҥ-влак кумшо пачашым нӧлтен пытарат. Тыгодымак икымше пачашыште тыршат, окна блоклам шындылыт, шокшым пуымо сетьым да вӱд пучым вераҥдат, спорт площадкым ыштат.

«Октябрь тӱҥалтыште объектыш шокшым пуртена», – увертарен Владимир Чуйков.

«Олаште школым 30 ий чоҥымо огыл. Тиде объектыш кокымшо гана толынам, подрядный организацийлан йодышем кызытеш уке, чылажат график почеш ышталтеш. Ме кызыт гына мебель, школ оборудований нерген мутланышна. Сандене ме ача-ава да йоча-влак дене пырля тунемме верын почылтмыжым вучена. Шинчымаш кечылан мый тӱн шотышто ялласе школыш лектын коштам, но шушаш ий 1 сентябрьыште тышке толам», – каласен Марий Элым вуйлатыше.