Марий Элым вуйлатыше Юрий Зайцев Йошкар-Оласе «Юбилейный» микрорайонышто верланыше 825 веран у школым чоҥымо пашам терген.
Тушто тунемме верым нӧлташ кумдыкым ямдылыме, кӱртньӧ-бетон каркасым монтироватлыме, а кызыт пырдыж панельым, объект кӧргысӧ инженер системым, окна блок-шамычым монтироватлат.
Марий Элым вуйлатыше палемден: тунемме вер ты микрорайонысо калыклан моткоч кӱлеш, тудо йоча-влакым ик смене дене туныкташ йӧным ышта, сандене жапыштыже чоҥен шуктыман.
Объектыште лийме деч вара Юрий Зайцев «Просвещений» концессий компанийын еҥже-влак дене совещанийым эртарен. Тушто эше ик гана каласен: школ тений 1 сентябрьлан ямде лийшаш.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
