1 ноябрьыште Марий Элым вуйлатыше Юрий Зайцев Волжск олаште тулык йоча ден аварийный пӧртлаште илыше-влаклан у пачер сравочым кучыктен.
Чыла шотыштат йӧнан пачерым тымарте 20 утла аварийный пӧртыштӧ илыше 66 еш налын. Тылеч посна 24 пачер тулык йоча-шамычлан логалын.
Ю.Зайцев волжан-влакым кужун вучымо куанле кече дене шокшын саламлен да аварийный илыме верым шагалемдыме, калыкым шӱкшемше илыме фонд гыч кусарыме да тулык йоча-влаклан пачерым ойырымо пашам Марий Эл правительствын ик эн ончыч шуктымо задачыж семын палемден.
«Тиде пеш серьёзный событий. Шукерте огыл чоҥымо шуко пачеран у пӧртыш 194 еҥ илаш кусна. Таче тыгак ача-аван ончымыж деч посна кодшо 24 гражданин сравочым налеш. Тиде пашам умбакыжат шуена. Идалык мучаш марте ме эше 932 еҥым кусарышаш, 20 тулык йочалан пачерым пуышаш улына», – манын тудо.
Регионым вуйлатыше у пачер оза-шамычлан пиалым, улан илышым, йӧратымашым, порылыкым да вашумылымашым тыланен.
Волжск олан мэрже Рафис Шагвалеев республикым вуйлатыше Ю.Зайцевлан калыкым аварийный илыме верла гыч кусарыме программым илышыш пурташ да олалан кӱлешан моло йодышымат решитлаш полшымыжлан тауштен.
Ю.Зайцев пачер-влакым ончал савырнен, тыгодым нунын илаш йӧнан улмыштым палемден.
«Граждан-влакым аварийный илыме фонд гыч кусарымаш» республиканский адресный программын кышкарыштыже Волжскышто тиде паша дене кылдалтше мероприятий-влак 2020 ий гыч шукталтыт. 2017 ий 1 январьлан тыште шуко пачеран 67 пӧртым аварийныйлан шотлымо. Кок ий наре жапыште 640 утла еҥым у пачерыш кусарыме, 10 тӱжем квадрат метр аварийный илыме верым кораҥдыме. 45 тулык йочалан пачерым пуымо.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
