У корным ышташ тӱҥалыныт

Тудо Пӱнчер ден Ширяйково микрорайон гоч шуйна. Тидлан ончыкыжым Изи Какшан гоч у кӱварым чоҥат.

У автомагистральым ышташ кӱлмӧ нерген икмыняр ий ончычак ойлаш тӱҥалыныт ыле. Пиалеш, тиде жап толын шуын. Ынде Йошкар-Олан Заречный ужашыштыже илыше да Ширяйково ден 9-ше микрорайонлаште ыштыше-влаклан, эрдене эр лектын, паша верышкышт миен шуаш пел ола гоч эрташышт огеш перне. Тиде моткочак куандара! Адакшым тудо поснак эрдене да кастене  тӱҥ кӱварыште «шочшо» «пробкымат» иземдаш полша.

- Тиде магистраль оласе «спальный» ден промышленный район-влакым уша. Тудын кужытшо ныл километр наре лиеш. Корным федеральный окса дене чоҥышаш улыт. А тудо тунам ойыралтеш, кунам республик пашам сайын шуктымым да оксам шот дене кучылтмым ончыкта, - каласен тений эртарыме икымше совещанийыште Марий Эл вуйлатыше Александр Евстифеев.

Чоҥымо пашам «Марийскавтодор» акционер ушем шукташ тӱҥалеш. Лач тудак конкурсышто сеҥен. Кызыт олан мэрийже дене пырля мланде участкым формироватлыме, кушкыл-влакым руымо, коммуникацийым ямдылыме йодыш-влак каҥашалтыт.

- Тиде корно кумдыкыш куп пура, сандене кугурак ужаш пашам телым ыштыман. Кызытсе жаплан паша Изи Какшанын шола велныже шукталташ тӱҥалеш, - палдарен республикысе правительстве председательын икымше алмаштышыже Александр Сальников.

Регион вуйлатыше чоҥышо-шамыч дене ышталтшаш у корно кумдыкышто улшо газ коммуникаций ден гараж-влакым кусарыме шотышто йодышымат тарватен.

- Собственник-шамычлан компенсацийым темлен, ик ойыш шуаш тыршыман.  Кӱлешак гын, суд мартеат шуаш лиеш. Но пашам тидлан кӧра чарен шогалтыман огыл, - каласен Александр Евстифеев.

Пӱнчерыште руымо пашам шукташ логалме шотышто тыге ойлен:

- Калык палышаш: тиде общественно-кӱлешан проект, а иктаж-кӧн коммерческий интерес манмыжым шуктышашлан шоныде чоҥымо илыме вер бизнес-проект огыл. Тиде – еҥ-влаклан республиканский проект. Тиде – рӱдолан транспорт схемыжым шотыш кондымаште кӱлешан паша.

«Устойчивое развитие сельских территорий» подпрограмме дене келшышын, кодшо ийын Марий Турек, Шернур, Курыкмарий, Кужэҥер да Параньга районлаште чылаже 15,4 километр корным чоҥымо да пашашке колтымо.