У ий да Рошто пайрем дене!

​Тендам У ий да волгыдо Рошто пайрем дене саламлем!

Ме нуным кеч-кунамат волгыдо шижмаш, поро шонымаш дене вашлийына, шушаш ийыште чыла шонен пыштымына шукталтешак манын алал кумылын ўшанена.

Мучашке лийшемше ийым аклышыла, ме тенийсе пашам иктешлена, мом ыштен шуктымына нерген шонкалена, ончыкылан планым ыштена.

Марий Эллан эртыше жап пеш пайдале да чапле событийлан поян лийын. Российын Президентше В.В.Путинын тўҥалтышыж почеш ыштыме национальный проект-влакым илышыш шыҥдараш тўҥалмылан кӧра республик вияҥмаштыже у йыжыҥыш тошкалын, кызытак ятыр кугу сеҥымашке шуын.

 Инвалид-влакын III Всероссийский спартакиадышт чынже денак 2019 ийысе кугу событийыш савырнен. Тудо Марий Элыште пеш сайын эртен да чапле программан улмыжлан кӧра республикыште илыше еҥ-влакын веле огыл, тыгак шуко унан ушеш кодын.

 Марий кундемым вияҥдымашке надырым пыштыше, достойнын пашам ыштыше, регионын илышыштыже чулымын участвоватлыше чыла еҥлан таум ойлем. Тўшка задачым шуктышаш верч чак чумырген тыршен шогымылан кӧра ме ўшанлын ончыко каена, у сеҥымашке шуына.

2020 ий республикылан исторический идалыкыш савырна: Марий Эл курымаш лўмгечыжым палемда. Чыла шонен пыштымым илышыш шыҥдарышашлан да у курымыш пеш чапле лектыш да кугу план дене тошкалшашлан мемнам тыршен ыштышаш кугу паша вуча.

Марий Эл Республикыше илыше чыла еҥлан пайрем кумылым, пеҥгыде тазалыкым, нимучашдыме вий-куатым, тыныслыкым да чыла порым тыланем. Тек шушаш ий тыланда у сеҥымашыш шумо жапыш савырна да суртышкыда пиалым конда. Эреак сеҥымашке шуаш да веселан пайремлаш тыланем!

Пайрем дене! У ий дене!

Марий Эл Республикым Вуйлатыше
А.А.Евстифеев