Марий Эл вуйлатыше Юрий Зайцев специальный военный операцийыште участвоватлыше-влакын ешышт, лишылышт-шамыч дене вашлийын.
Тушто тургыжландарыше йодыш-влакым каҥашеныт, тыгак военнослужащий-шамычын ешыштлан социальный поддержкым пуымо шотышто йодышым тарватеныт.
Регион вуйлатыше мемнан воинна-влаклан, илышыштым чаманыде элнам аралымыштлан тауштен.
– Чыла нелылыкым шотыш налде, те ӱдырамаш вий-куатым арален кодеда. Тендан лишылда, пелашда, ачада порысым шуктат. Мемнан задачына – тылыште чыла сай лийже манын, нунын ешыштлан полшаш, – палемден Юрий Зайцев.
Тыгак тудо боецна-шамычын ешыштлан, родо-тукымыштлан могай полыш лийшашым умылтарен.
Таче кечылан мобилизоватлыме, контракт почеш СВО-шко кайыше-влаклан регионал выплатым тӱлымӧ деч посна патырна-шамычын ешыштлан 2778 социальный паспортым ыштыме. Нунылан умбакыжат тӱрлӧ полыш лиеш.
Специальный военный операцийын участникше-влаклан мо кӱлешым налыт, колтат. Тидлан порок умыл фондым ыштыме. Предприниматель, тыглай еҥ-влакат окса дене полшат. Погымо средства дене чоҥымо материалым, инструментым, радиостанцийым, квадрокоптерым, тепловизорым да фронтлан кӱлеш моло оборудованийым налыт.
Республикыште тыгак волонтёр штаб почылтын. Нунын полышышт дене землякна-военнослужащий-шамычлан икмыняр шӱдӧ посылкым колтеныт. Тушто – блиндажлан келшыше сорта, маскироватлыме сетке, йоча-влакын возымо серышышт да молат…
Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен
