Эртыше кечылаште Республик вуйлатыше Юрий Зайцев, «Победная почта» проект дене келшышын, Йошкар-Оласе каныме рӱдереш вераҥдыме интерактивный площадкылаште лийын.
Проект почеш 12 июньышто лӱмынак келыштарыме палаткыште специальный военный операцийыште улшо участник-шамычлан серышым погеныт. Марий Эл вуйлатыше боец-влаклан серышым возен да волонтёр-шамыч дене пырля кум тылзе ты сеҥымаш почтым организоватлаш полшаш сӧрен.
– Мыланем тыгай акцийыште участвоватлаш – куан. Уло кумыл дене шке тыланымашем серенам. Тек мыйын серышем кундемна гыч боецналан логалеш да неле кредалмаште полша. Элнан сеҥымашыж верч! – манын Юрий Зайцев.
Тудын палемдымыж почеш, Сеҥымаш почтын полышыж дене специальный военный операций кундемыш 1500 утла серышым колтымо.
– Тылыште улшо-шамычлан чылаштлан, боецна-влаклан тазалыкым тыланен, сеҥымаш дене вашкерак мӧҥгышкышт пӧртылышт манын, серышым возаш кӱлеш. Тыгай полышат нунылан ӱшаным пуа, вет пӧръеҥ-шамычлан тушто неле. Тиде акцийлан тӱҥалтышым мый ыштенам. Тудым умбакыже шуена. Тыгаяк площадкым Йошкар-Олан историйже тоштерыште организоватлена. Акций Российын кечыжым палемдыме годым стартым налын. Тылзе гыч СВО-н участникше-влаклан 1000 серышым, 40 талисманым колтымо, – палемден Ю.Зайцев.
Регион вуйлатыше эше кок интерактивный площадкыш («Талисманым ыштыме дене мастер-класс» ден «Мемнан Геройна-влак») миен.
«Наши Герои» площадкеш кок экран келыштаралтын. Тушто интерактивный фотогалереян сенсорный информационный киоск уло. Тыге специальный военный операцийын участникше-влакын биографийыштым, нунын подвигыштым, наградыштым рашемдаш лиеш. Тыгак фотогалерейыште военнослужащий-шамычым поддерживатлыше, гуманитар полышым пуышо волонтёр, мер пашаеҥ, тӱрлӧ аланыште тыршыше лӱмлӧ еҥ-влак дене палдарыме.
Юрий Зайцевын палемдымыж почеш, республикна гыч патырна-шамычын подвигышт, поснак шке илышыштым чаманыде элнам аралыше патриотна-влак нерген каласкалышаш, палдарышаш улына.
– Кажне ава, кажне пелаш, икшыве шке эргыже, марийже, ачаж нерген, тудын эл верч ӱмыр лугыч лиймыж нерген палышт манын шонат, – ойлен Юрий Зайцев.
Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен
