Тыгайже кокыт гына

Тений ты посёлкысо стадионым капитально олмыктеныт. Футбол пасум тєремденыт, тачысе саманлан келшыше искусственный шартышым келыштареныт, ончаш толшо-влаклан те‰гылым ыштеныт да вургемым алмашташ шокшемдыман верым ямдыленыт.

Тыге ынде тиде пасушто идалыкын кеч-могай пагытыштыже модаш лиеш манын пе‰гыдемден А.Евстифеевлан молодёжный политике, спорт да туризм министр Л.Батюкова.

– Республикыштына кызытеш тыгай леведышан кок пасу веле. Иктыже –  Волжскысо МарБУМ-ын стадионыштыжо. Ончыкылык пасу олмыш ондак мландым кўнчат, вара тушко шолдыра кўм оптат, а ўмбакше – тыгыде кўм. Чыла тидым ошма дене леведыт. Тыгай пасум пеш писын тєрлаш, шотыш кондаш лиеш, – манын умылтарен Лидия Батюкова.

А.Евстифеев тыгай шартышым телым кузе чытен лекмыж нерген йодын.

«Пеш сайын. Эсогыл лумымат пе‰гыдемдаш лиеш», – манын Лидия Александровна.

Министрын палемдымыж почеш, футбол – республикыште базовый да спортын эн модмо тўшка видше. Тудын дене 12 тўжем е‰ пе‰гыде кылым куча. Нунын кокла гыч 800 е‰ – олимпийский резерв училищын воспитанникше.  Красногорскыштат футболым йєратат. 12-17 ийготан 100 ўдыр-рвезе заниматлалтеш. Тидыжым ты кундемыште самырык тукымым  физически да патриотически воспитатлымаштат сай велым гына палемдыман.

Регион вуйлатыше пашам кўкшын аклен да тыгай футбол пасум шукемдаш кўлмє нерген ойлен. Тыгак тудо чо‰ышо-влакын тыршымыштым  палемден, подрядный организацийын вуйлатышыже Марат Вафин дене мутланен, сай пашаштлан тауштен. Верысе футбол командын тренерже дене вашлийын, йоча-влаклан мечым пєлеклен.

– Тек тиде пєлек тыланда се‰ымашым конда, сайын модаш ўшаным пуа. Тыгай пасу моткоч кўлеш, шонем. Лишыл жапыште тыште футбол дене та‰асымашламат эртараш ямдылалтыт. Футболист-влак деч се‰ымашым вучена, – палемден республик вуйлатыше. – Самырык-шамыч дене пашам ыштыза. Ты паша эн ончыч йоча-влаклан куаным кондышаш, а тренироватлалтме да экипировко шотышто чылан шонышаш улыт.

Александр Евстифеев тыгак тений Юрино посёлкышто стадионым олмыктымымат, а Козьмодемьянскыште чо‰ымымат ушештарен. Чылажат регионыштына кумылан кажне айдеме спорт дене кылым кучен кертше манын ышталтеш.