Туризм пашам жаплан чарыме

«Ме таче коронавируслан кӧра лекше нелылык нерген веле огыл, а экономике ден предпринимательствылан полшымо нерген кутыраш погыненна. Мыняр ончыкырак ужмашан пунчалым луктына, тунар ӱшанлырак лиеш республикысе экономике положенийна», - каласен Марий Эл вуйлатыше Александр Евстифеев.

Унагудо да туроператор организаций-влакын пашашт нерген кутырымо тиде гана. Республик Минспортын данныйже почеш, услуго ак кызытеш вашталтын огыл. Ведомстве Туризм шотышто федерал агентстве дене онлайн-режимыште пашам ышта. Авиаций да кӱртньыгорно дене шупшыктымо, турист тӱшка-влаклан верым бронироватлымым чарныме дене кылдалтше чыла увер регионысо туризм организаций-влакын вуйлатышыштлан колталтеш да официальный интернет-ресурсышто шындалтеш.

Тачысе кечылан республикыште турист-влакым тӱшкан вераҥдыме 94 объект шотлалтеш – тиде чумыржо 6 тӱжем утла койко-верыш погынышо санаторий, каныме базе, хостел да унагудо-влак.

Апрельлан верым йӧршын бронироватлыме огыл, палемден молодёжный политике, спорт да туризм министр Лидия Батюкова. 26 мартлан ончымаште 106 койко-веран ик хостел ден ик унагудо пашам ыштымым чарненыт. Туроператор организаций-влак нерген ойлаш гын, республике кӧргысӧ туризм дене чыла 8 туроператор штатный режимыште пашам ышта. Регион мучко тӱшкан экскурсийым эртарыме услуго кызыт ок шукталт. Унагудо ден туроператор услугым бронироватлаш йодмашым заказчик-влак май тылзе марте коранденыт. Туризм сферыште 5 тӱжем еҥ пашам ышта.

«Вес элласе каныш тений иземеш, тугеже эл кӧргысӧ туризм кугем кертеш. Сандене сиуаций тылзе еда вашталт кертмылан ямде лийман. Туризм 1 июнь але 1 июль гыч почылтеш гын, турист-влакым савыраш кӱлмӧ нерген шонышаш улыда. Унагудо-влаклан фондыштым шотыш кондыман да уна-влак дене кылым арален кодыман. Туризм программе нергенат каласкален шогыман», - шӱдымӧ семын каласен Александр Евстифеев.

Промышленность, экономике вияҥмаш да торговльо министерстве туризм сферыште изи бизнеслан полшымо мере нерген йодышым рашемдышаш.

Республикысе предпринимательствылан полшымо фонд директор Максим Талалаев изи да кокла кугытан предпринимательствылан полшымо шотышто шукталтше мере нерген палемден. Идалык тӱҥалтыш гыч фонд чумыржо 47 миллион теҥге кугыт 53 займым пуэн. Тидыже ӱмашсе икымше квартал дене таҥастарымаште 2,1 ганалан (25 микрозаймлан) шукырак да кугыт шот дене 1,8 ганалан утларак.